Batys Qazaqstanda koronavırýs juqtyrý kórsetkishi 5,2 paıyzǵa kemidi

ORAL. QazAqparat – Batys Qazaqstan oblysynda sońǵy aptada koronavırýs juqtyrý kórsetkishi aldyńǵymen salystyrǵanda, 5,2 paıyzǵa (3 naýqasqa) kemidi, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, sońǵy táýlikte 6 adamnan koronavırýs tabylsa, 14 naýqas jazylyp shyǵyp, úıine oraldy.

Óńirde pandemııa bastalǵannan beri 40 064, sonyń ishinde bıyl 30 843 adam indet juqtyrdy.

Oblysta COVID-19 dıagnostıkasy boıynsha 13 zerthana jumys jasaıdy. Sońǵy táýlikte 795 zertteý júrgizildi.

Kúni búgin ambýlatorlyq em alyp jatqan 286 adamnyń 76 paıyzynda aýrý jeńil ótýde. 4 paıyzynyń jaǵdaıy ortasha. 20 paıyzy – sımptomy joqtar.

Oblysta 504 tósektik 9 ınfektsııalyq statsıonar tek 8,9 paıyzǵa tolǵan. Qazir aýrýhanalardaǵy 45 naýqastyń 9-y jansaqtaý bólimshesinde. Bulardyń úsheýi ınvazıvti emes jasandy tynys alý apparatyna, altaýy ottegi kontsentratoryna qosylǵan.

Jyl basynan beri 685, sonyń ishinde sońǵy aptada 7 adam koronavırýstan kóz jumdy.

Basqarmadan túsken málimetke qaraǵanda, vaktsınatsııa bastalǵannan beri 255 708 adam (egilýge tıisti turǵyndardyń 61,6 paıyzy) birinshi, 242 382-si (58,5 paıyzy) ekinshi komponentpen egildi.

Oblys boıynsha 15 311 adam revaktsınatsııadan ótti. Sondaı-aq Pfizer vaktsınasyn qabyldaǵan 5 223 adamnyń 2 902-si – jasóspirimder, 162-si – júkti, 2 159-y – bala emizetin áıelder.

Eske sala keteıik, budan buryn Batys Qazaqstanda 5100-den astam adamnyń Pfizer vaktsınasymen egilgenin jazǵan bolatynbyz.