Batys Qazaqstanda koronavırýs juqtyrý kórsetkishi 46 paıyzǵa tómendedi

ORAL. QazAqparat – Batys Qazaqstan oblysynda sońǵy aptada aldyńǵymen salystyrǵanda, koronavırýs juqtyrý kórsetkishi 46 paıyzǵa (47 naýqasqa) tómendedi, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, óńirde pandemııa bastalǵannan beri 39 971, bıyl 30 750 adam vırýs juqtyrdy.

Jyl basynan beri aýyrǵan 3030 balanyń 3018-i jazylyp shyqty, 12-si emdelip jatyr.

Oqý jyly bastalǵan 1 qyrkúıekten beri 907 oqýshydan koronavırýs anyqtaldy. Shyńǵyrlaý jáne Báıterek aýdandarynda 2 mektepte 2 synyp karantınge jabylǵan.

Kúni búgin 286 adam ambýlatorlyq, 70 naýqas statsıonarlyq em qabyldaýda. Sonyń 10-y jansaqtaý bólimshesinde. Naýqastardyń ekeýi ınvazıvti jasandy tynys alý apparatyna, beseýi ınvazıvti emes osyndaı qurylǵyǵa, beseýi ottegi kontsentratoryna qosylǵan.

Jyl basynan beri 677, jeltoqsanda 8, sońǵy aptada 3 adam koronavırýstan kóz jumdy.

Basqarma málimetine qaraǵanda, oblys boıynsha 252 956 adam (egilýge tıisti turǵyndardyń 61 paıyzy) vaktsınanyń birinshi, 238 606-sy (57,6 paıyzy) ekinshi komponentimen egildi.

Sondaı-aq 6922 adam revaktsınatsııadan ótti. 4106 adam Pfizer kompanııasynyń vaktsınasyn alsa, sonyń 2405-i – jasóspirimder, 116-sy – júkti, 1585-i – sábı emizetin áıelder.

Eske sala keteıik, budan buryn Batys Qazaqstanda 3800-den astam adamnyń revaktsınatsııadan ótkenin jazǵan bolatynbyz.