Batys Qazaqstanda koronavırýs juqtyrǵandardyń 80 paıyzǵa jýyǵy jazylyp shyqty
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnıkatsııalar qyzmetinde málim etýinshe, osy kezge deıin oblysta 11 947 adam indet juqtyrsa, sonyń 6 377-si – aýrý belgisi barlar, 5 570-i – sımptomy joqtar.
Dertke shaldyqqandardyń 9 554-i nemese 79,9 paıyzy emdelip shyqty. Sonyń ishinde 4 188-i statsıonarda jatsa, 5 366-sy ambýlatorlyq em aldy.
Óńirde 199 adam koronavırýstan kóz jumdy.
Gúlnár Maqsotqyzynyń sózine qaraǵanda, qazirgi tańda 591 tósektik 7 juqpaly aýrýlar statsıonarynda 351 adam emdelip jatyr. Sondaı-aq 185 tósektik 4 karantındik statsıonarda 31 naýqas jatyr.
Juqpaly aýrýlar aýrýhanalaryndaǵy 62 tósektik jansaqtaý bólimshelerinde 27 naýqas bar. Bulardyń ishinde 9-y – 35-60, 15-i – 60-80 jas aralyǵyndaǵylar, úsheýi – seksennen asqandar. 22 naýqastyń sozylmaly syrqaty bar, sonyń ishinde 16-sy júrek-qan tamyrlary dertine shaldyqqan.
«Kúni búgin ınvazıvti emes jasandy tynys alý apparatyna 3, ottegi kontsentratoryna 11, ortalyqtandyrylǵan ottegi kózine 101 adam qosylǵan. Qosymsha 1996 tósektik rezervtik qor ázirlendi, sonyń 1221-i ınfektsııalyq, 775-i karantındik statsıonarda daıyn. Emhanalarda COVID-19 jáne pnevmonııa belgileri, sozylmaly syrqaty bar patsıentterdi, sondaı-aq kórsetkishter boıynsha júkti áıelder men balalardy úıde baqylaý úshin 124 mobıldi brıgada jumys jasaýda. Mobıldi brıgada táýligine orta eseppen 280 shaqyrýǵa barady, sonyń ishinde 70-i koronavırýs boıynsha», - dedi G.Ábdirahmanova.
Eske sala keteıik, Batys Qazaqstan oblysynda karantınge jabylǵan mektepter sany 13-ke jetti.
