Batys Qazaqstanda koronavırýs juqtyrǵandar sany ósti

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, Nur-Sultan qalasyndaǵy respýblıkalyq vırýsologııalyq zerthanaǵa jiberilgen 22 synamanyń 18-inen nemese 81,2 paıyzynan «Delta» shtamy tabyldy.

Bul shtamnyń ereksheligi, óte tez taraıdy, ınkýbatsııalyq kezeńi buryn 14 kún bolsa, qazir jeti kún ishinde taralyp úlgeredi. Eger buryn naýqas 3-4 adamǵa juqtyrsa, «Delta» shtamy barlar 5-6 adamǵa taratady. Aýrý da aýyr ótedi.

Sońǵy aptada (25 maýsym – 1 shilde) aldyńǵymen (18-24 maýsym) salystyrǵanda, aýrý juqtyrý kórsetkishi 38,2 paıyzǵa ósip ketip otyr.

Sońǵy táýliktiń ózinde oblysta 143 adamnyń indet juqtyrǵany anyqtaldy.

Nurlybek Ermekulynyń sózine qaraǵanda, 1 maýsymnan beri 2568 naýqas tirkelse, sonyń 46 paıyzy (1180) Oral qalasy, 18 paıyzy (460) Báıterek, 13 paıyzy (326) Bórli jáne 6 paıyzy (151) Tasqala aýdanynyń úlesine tıedi.

Sonyń ishinde 14 jasqa deıingiler – 302, 15-17-degiler – 104, 18-25-tegiler – 190, 26-40-taǵylar – 703, 41-60-taǵylar – 778, 60-tan joǵarylar – 491. Kóbi – 41-60 jas aralyǵyndaǵy naýqastar.

Óńirde 1 maýsymnan beri memlekettik shekaradan ótken 38581 adamnyń 14366-sy – jolaýshylar. Anyqtamasyz ótken 763 jolaýshynyń ekeýinen kovıd tabyldy. Sondaı-aq halyqaralyq júk tasymalymen aınalysatyn 14557 júrgizýshiniń 2189-ynda anyqtama bolǵan joq. Bulardyń altaýynan indet anyqtaldy.

«Sońǵy aptada monıtorıng toptary 121 reıd júrgizip, 573 nysandy qamtydy. 13 nysanda karantın talabyn buzýshylyq anyqtaldy. 11 hattama toltyrylyp, 997 195 teńge aıyppul salyndy. Nysandar jumysyn ýaqytsha shekteý úshin ekonomıkalyq sotqa 2 materıal daıyndalýda. Oblysta epıdemıologııalyq ahýal óte kúrdeli. Sondyqtan turǵyndarǵa sanıtarlyq talaptardy tolyq saqtaý kerektigin eske salamyz», dedi N.Mustaev.

Eske sala keteıik, budan buryn Batys Qazaqstanda ekpe alǵandar sany 97 myńǵa jýyqtaǵanyn jazǵan edik.