Batys Qazaqstanda koronavırýs juqtyrǵandar sany kóbeıip barady
ORAL. QazAqparat – Batys Qazaqstan oblysynda koronavırýs juqtyrǵandar sany kóbeıip barady, dep habarlaıdy QazAqparat tilshisi.
BQO taýarlar men kórsetiletin qyzmetter sapasy men qaýipsizdigin baqylaý departamentiniń baspasóz qyzmetinen alynǵan málimetke qaraǵanda, kúni búginge deıin 544 adam aýyrsa, sonyń 269-y jazylyp shyqty.
Qazirgi tańda 275 adam oblystyq juqpaly aýrýlar aýrýhanasynda emdelýde. Sondaı-aq 20 adam provızorlyq, 511 adam karantındik statsıonarda jatyr. Úılerinde oqshaýlanǵan 1276 adam dárigerlerdiń baqylaýynda.
BQO ákimdigi málim etkenindeı, óńirde sońǵy tirkelgen 51 adamnyń (ósim – 10,1 paıyz) 27-si – Teńiz ken ornynan kelgen oblys turǵyndary.
Sondaı-aq 10 adam buryn koronavırýs juqtyrǵandarmen qarym-qatynasta bolǵan. 12 adamnan profılaktıkalyq maqsatta synama alynǵan kezde anyqtaldy.
Taǵy eki adam – Reseıde jumys isteıtin Shymkent qalasynyń turǵyndary. Olar «Tasqala» avtoótkelinen ótken kezde karantındik statsıonarǵa jatqyzylǵan.
Oblysta indetke qarsy kúres jalǵasýda.
Eske sala keteıik, budan buryn Tasqala aýyly karantnnge jabylǵanyn jazǵan bolatynbyz.
