Batys Qazaqstanda koronavırýs juqtyrǵandar sany 8,8 paıyzǵa azaıdy

ORAL. QazAqparat – Batys Qazaqstan oblysynda sońǵy aptada aldyńǵymen salystyrǵanda, koronavırýs juqtyrǵandar sany 8,8 paıyzǵa (58 adamǵa) azaıdy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkendeı, sońǵy táýlikte 56 naýqas anyqtalyp, 112 adam jazylyp shyqty.

Jyl basynan beri 13337 adam syrqattansa, sonyń 56,2 paıyzy (7508) Oral qalasynda, 13,7 paıyzy (1838) Báıterek, 11,2 paıyzy (1496) Bórli aýdanynda tirkelgen.

Óńirde barlyǵy 1123 tósektik 18 ınfektsııalyq statsıonarda 362 naýqas (32-si jansaqtaý bóliminde) em qabyldaýda. Sonyń ishinde Oral qalasynda 600 tósektik 5 aýrýhanada 285 adam jatyr.

Oblys boıynsha 1444 (679-y ınfektsııalyq, 765-i karantındik) tósek-oryn rezerv retinde ázirlendi.

Basqarma málimetine qaraǵanda, turaqtandyrý qoryn tolyqtyrýǵa dári-dármek alý úshin 422 mln teńge bólinse, sonyń 217 mln teńgesine kelisimshartqa qol qoıylǵan.

Koronavırýstyń bar-joǵyn anyqtaıtyn 13 zerthana bolsa, sońǵy táýlikte 3144 zertteý júrgizildi.

Іndet bastalǵannan beri Batys Qazaqstanda 22558 naýqas tirkelip, sonyń 17681-i jazylyp shyqty. 338 adam kóz jumdy.

Kúni búginge deıin 68458 adam vaktsınanyń birinshi, 31696-sy ekinshi komponentimen koronavırýsqa qarsy egildi.

Eske sala keteıik, budan buryn Batys Qazaqstanda sońǵy tórt kúnde 360-qa jýyq adamnan indet tabylǵanyn jazǵan bolatynbyz.

Sondaı-aq Batys Qazaqstanda karantın sharalary jeńildedi.