Batys Qazaqstanda kólik ıeleri erekshe nómirlerge 73 mln astam teńge jumsaǵan

ORAL. QazAqparat - Batys Qazaqstan oblysynda kólik ıeleri jyl basynan beri erekshe nómirlik belgiler alýǵa 73 mln astam teńge jumsaǵan, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy BQO boıynsha fılıalynyń baspasóz qyzmetinen málim etkenindeı, 277 adam Oral qalasynyń mamandandyrylǵan HQO-nda osynshama qarajatqa joǵary suranystaǵy nómirlerdi satyp alǵan. Mysaly, 25 jastaǵy jigit úsh bestikten bastalatyn nómirge 419 631 teńgesin qıǵan. Ol 5 sany sáttilik ákeledi dep senedi.

Fılıaldan túsken málimetke qaraǵanda, kólikti rásimdeý kezinde mamandandyrylǵan bólim qyzmetkerleri quny 2,8 AEK nemese 8 576 teńge bolatyn qarapaıym memlekettik nómirler tizimin usynady. Kádimgi nómirlik belgilermen qatar, sandar men áripterdiń ádemi kombınatsııasyn satyp alýǵa bolady. Quny da sáıkesinshe joǵary: 57 AEK (174 591 teńge) pen 285 AEK (872 955 teńge) aralyǵynda.

«Sonymen qatar, joǵary suranystaǵy nómirler qataryndaǵy sandar nemese áripterdi qoldana otyryp, óz qalaýyndaǵy nómirge Ákimshilik polıtsııa basqarmasyna jolyǵý arqyly tapsyrys berýge bolady. Memlekettik nómirdi basqa adamǵa satýǵa nemese syılaýǵa bolmaıdy. Avtokóligin satqan jaǵdaıda nómirdi mamandandyrylǵan HQO-nda 6 aıǵa deıin ýaqytsha saqtaýǵa qaldyra alady», - dep habarlady vedomstvodan.

Eske sala keteıik, budan buryn bıyl náreste kútimi boıynsha 152 myń járdemaqy SMS arqyly rásimdelgenin jazǵan bolatynbyz.