Batys Qazaqstanda kóktemgi egis jumystaryna 600 mln teńge bólindi
ORAL. QazAqparat - Batys Qazaqstan oblysynda bıyl barlyq egis kólemi 482,1 myń gektardy quramaq.
Bul týraly Ortalyq kommýnıkatsııalar qyzmetiniń óńirlik fılıalynda BQO aýyl sharýashylyǵy basqarmasy egin sharýashylyǵy bóliminiń basshysy Denıs Omashev málim etti, dep habarlaıdy «QazAqparat» tilshisi.
Onyń aıtýynsha, dándi daqyldar egistigi 253 myń gektar bolmaq, bul ótken jylǵydan (215,6 myń ga) 14,7 paıyzǵa artyq. Sonyń ishinde 72 myń ga alqapqa kúzdik dándi daqyldar egilgen bolatyn. 181 myń gektarǵa jazdyq dándi daqyldar sebilmek. Maıly daqyldar 52 myń ga, sonyń ishinde kúnbaǵys 40 myń gektarǵa egilmek. 9 myń gektarǵa kartop jáne kókónis, baý-baqsha daqyldary otyrǵyzylmaq. Mal azyqtyq daqyldar egistigi 168 myń gektarǵa jetpek.
Oblys tuqymmen tolyq qamtylǵan. Jazdyq dándi daqyldar tuqymy jospardaǵy 19,8 myńnyń ornyna 24,8 myń tonna bolyp (124,9 paıyz) daıyndaldy. Sondaı-aq maıly daqyldar tuqymy 21,7 paıyzǵa (460-tyń ornyna 560 tonna), mal azyqtyq daqyldar tuqymy 20,5 paıyzǵa (782-niń ornyna 942 tonna) artyǵymen ázirlendi. 11,7 myń tonna tuqymdyq kartop ta tolyǵymen jetedi.
Kóktemgi-dalalyq jumystarǵa 4173 traktor, 4965 tuqymsepkish, 793 qopsytqysh jáne 46 egý kesheni qatystyrylmaq. Qazirdi ózinde traktorlardyń 92, tuqymsepkishterdiń 94, qopsytqyshtardyń 96 paıyzy daıyn.
Egiske qajetti 12 myń tonna dızel otynyn operator «QazMunaıGaz ónimderi» JShS jetkizetin bolady. Sáýir aıynda 1 lıtr dızel otynynyń baǵasy 122 teńgeden berilmek.
«Kóktemgi egis jumystaryn qarjylandyrýǵa «Keń dala» baǵdarlamasy arqyly 600 mln. teńge (6 paıyzdyq mólsherlememen) qaralǵan. Qarjy «Agrarlyq nesıe korporatsııasy» AQ BQO fılıalynyń aýdandyq nesıe seriktestikteri arqyly beriledi. Eń bastysy, kóktemniń ár kúni jylǵa azyq, degen, ýaqyt ótkizbeı, barlyq jumysty mezgilinde atqarý kerek», dedi D.Omashev.
