Batys Qazaqstanda kóktaıǵaqqa baılanysty jol jabyldy
ORAL. QazAqparat - Batys Qazaqstan oblysynda kóktaıǵaqqa baılanysty jol jabyldy, dep habarlaıdy QazAqparat tilshisi.
BQO jolaýshylar kóligi jáne avtomobıl joldary basqarmasynan túsken málimetke qaraǵanda, aýa raıynyń nasharlaýyna oraı jergilikti saǵat 19.30-dan bastap oblystyq mańyzy bar Chapaev-Jańaqala-Saıqyn jolynda barlyq kólik túrleri úshin qozǵalysqa shekteý qoıyldy.
"Qazaqavtojol" JShS BQO fılıalynyń málimeti boıynsha burqasyn men tumanǵa baılanysty saǵat 21.00-den bastap "Samara-Shymkent" (RF shekarasy - Oral qalasy), "Samara-Shymkent" (Podstepnyı aýyly - Aqtóbe oblysynyń shekarasy), "Oral-Tasqala-RF shekarasy" joldary da jabyldy.
Osyǵan baılanysty turǵyndarǵa SMS-habarlamalar jiberildi.
TJ departamentiniń baspasóz hatshysy Jádiger Qusaıynovtyń aıtýynsha, 12 qańtar kúni osyndaı eskertýge qaramastan, jolǵa shyǵyp ketken birqatar turǵyndar kólikterimen qar qursaýynda qaldy.
Atap aıtqanda, saǵat 10.00-de Tasqala-Oral joly boıynda batyp qalǵan 5 avtokólik (13 adam) shyǵaryldy. Oǵan qosa Tasqala-RF shekarasy jolynyń 7-shaqyrymynda 2 avtokólikke (10 adam) de osyndaı kómek kórsetildi.
«Qazgıdromet» RMK BQO fılıalynyń málimeti boıynsha 13 qańtar kúni de oblystyń keı jerlerinde tuman túsip, burqasyn kóterilip, kóktaıǵaq bolady. Soltústik-batystan soǵatyn jeldiń jyldamdyǵy sekýndyna 9-14, keı jerlerde 15-20 metrge deıin jetedi.
Oral qalasynda da aýa raıy buzylyp tur.
Eske sala keteıik, budan buryn da óńirde tuman túsip, kóktaıǵaq bolatyny, joldardyń jabylǵany týraly habarlanǵan edi.
