Batys Qazaqstanda «Kóknár-2009» jedel aldyn alý sharasy barysynda 42 kıládan astam esirtki zattary tárkilendi
ORAL. Jeltoqsannyń 3-i. QazAqparat /Ǵaısaǵalı Eraly/ - Batys Qazaqstan oblysynda mamyrdyń 30-y men qazannyń 30-y aralyǵynda júrgizilgen «Kóknár-2009» jedel aldyn alý sharasy barysynda 42 kg 179,2415 gramm esirtki zattary zańsyz aınalymnan alynsa, sonyń 42 kg 136,69 gramy - marıhýana, 37,4215 gramy geroın bolyp otyr,
dep habarlaıdy QazAqparat tilshisi oblystyq ishki ister departamentinen túsken málimetke silteme jasap.
Osy kezeńde 132 quqyqbuzýshylyq tirkelse, sonyń 43-i - ákimshilik, 89-y qylmystyq iske jatady. Esirtkiniń zańsyz aınalymyna baılanysty 61 adam ustalyp, 104 nashaqor esepke alyndy. 43 adam ákimshilik jaýapkershilikke tartyldy.
Jedel izdestirý sharalary barysynda Zelenov aýdany Trekın aýyly mańynda jabaıy soranyń 26 gektar jerge ósirilgeni anyqtaldy. Onyń jalpy salmaǵy 4 tonna 160 kıláni qurady. Jerdi jalǵa alǵan azamat ákimshilik jaýapkershilikke tartyldy. Sondaı-aq Oral qalasynda turatyn K. degen azamattyń ústinen QR QK 259-baby 2-bólimine sáıkes 30 kg 026,11 gramm keptirilgen marıhýana men 3,22 gramm geroındi zańsyz saqtaǵany úshin qylmystyq is qozǵaldy.
