Batys Qazaqstanda kıikter sany ósti
ORAL. QazAqparat - Batys Qazaqstan oblysynda kıikter sany ósip keledi. Bul týraly búgin óńirlik kommýnıkatsııalar qyzmetinde BQO orman sharýashylyǵy jáne janýarlar álemi aýmaqtyq ınspektsııasynyń basshysy Qaırat Qadeshev málim etti, dep habarlaıdy QazAqparat tilshisi.
Onyń aıtýynsha, kıikter oblystyń alty aýdanyn (Jánibek, Bókeı ordasy, Qaztalov, Jańaqala, Tasqala jáne Aqjaıyq) mekendeıdi. Bul jerdiń jalpy kólemi 8 mln gektardan asady.
Kıikter negizinen Jánibek, Bókeı ordasy jáne Qaztalov aýdandarynda toptalyp júredi. Qys kezinde Jańaqalaǵa jáne Bókeı ordasynyń ońtústik bóligine kóshedi.
«Bıylǵy sáýir aıynda kıikterdi áýeden sanaý jumystary júrgizildi. Onyń qorytyndysy shilde, tamyz aılarynda belgili bolady», dedi Q.Qadeshev.
Óńirde 2010 jyly kıik 39 myń bolsa, 2011 jyly 17,7 myńǵa deıin tómendep ketken edi. Sodan beri turaqty túrde ósýde. Atap aıtqanda, kıik sany 2012 jyly 20 myń, 2013 jyly 26,4 myń, 2014 jyly 39,5 myń, 2015 jyly 51,3 myń, 2016 jyly 70,2 myń, 2017 jyly 98,2 myń basqa jetti.
Qazirgi kezde kıikter Jánibek jáne Qaztalov aýdandarynda jappaı tóldeý ústinde. Soǵan baılanysty qorǵaý sharalary kúsheıtildi. Mysaly, «Ohotzooprom» ÓB» RMQK Batys óńirlik fılıaly ınspektorlarynan quralǵan 8 top 19 avtokólikpen sol jerlerde júr. Oǵan Almatydan 2 avtokólikpen taǵy bir jedel top kómekke kelgen. 6-22 mamyr aralyǵynda monıtorıng jáne bıologııalyq synama alý jumystary da júrgizilýde.
Aıta keteıik, brakonerlerdiń kıikti onyń asa qundy bolyp sanalatyn múıizi úshin aýlaıtyny belgili. Bıyldyń ózinde 22 brakonerlik deregi anyqtalyp, qylmystyq ister qozǵaldy. Zańsyz aýlaýshylardan 167 kıik ushasy men 268 múıiz tárkilendi. Sottarda 6 qylmystyq iske núkte qoıylsa, qalǵandary boıynsha tergeý amaldary jalǵasýda.
