Batys Qazaqstanda kıikten 1 myńnan astam sharýashylyqqa zalal keldi
Baýyrjan Qanatulynyń aıtýynsha, kıikten oblystyń alty aýdany zardap shegip otyr.
Sonyń ishinde Jánibek aýdanyna kıikter tóldeý úshin keledi.
Onyń sózine qaraǵanda, Keńes dáýirinde oblys aýmaǵynda kıiktiń sany 300 myńdaı bolsa, qazir 2 mln basqa jetti deýge bolady.
«Ózim agrobıznespen aınalysamyn. Bıyl Jánibek aýdanynda 350 gektar jerge sýdan shóbin egip edim. Sonyń 250 gektaryn kıik otap, tapap ketti. Elektr baqtashymen qorshadyq, esh paıdasy bolmady. «Ohotzooprom» ÓB» RMQK mobıldi tobynyń kómegimen qýyp ta kórdik. Kıik kók shópke bir aýyz tıse, ketpeıdi eken. Aqyry sonyń kesirinen 18 mln teńge zııanǵa qaldym. Oblys boıynsha barlyǵy myńnan astam sharýashylyqtarǵa 7,9 mlrd teńge zalal keltirilgen. Endi soǵan Úkimet tarapynan ótemaqy tólense deımiz. Qazirgi tańda sharýa qojalyqtaryna mal azyǵyn daıyndaý muń bolyp otyr. Alda qoıan qysy kele jatyr. Sharýalar malynan aıyrylsa, nesıesin tóleı almaı qalady. Óıtkeni sol maldy ósirý úshin nesıe aldy», - deıdi kásipker.
B.Sabanovtyń paıymdaýynsha, Astanada ótken jınalysta halyqaralyq sarapshylardyń ózderi kıik sanyn retteýge baılanysty usynysyn bildirdi.
Búkil álemde sondaı tájirıbe bar. Mysaly, Aýstralııada kengýrýdy, Meksıkada jabaıy jylqy – mýstangty sondaı jolmen azaıtyp otyrady.
«Sol sebepti Úkimet kıik sanyn retteýge qatysty naqty is-sharalardy júzege asyrýy kerek. Eger aqbókender kóbeıip ketse, odan malǵa aýrý da juǵýy múmkin. Kıik – eldiń baılyǵy. Qazir Reseıge de aýyp ketip jatyr. Sondyqtan kıiktiń eti men terisin de, múıizi men súıegin de tıimdi paıdalanýdyń joldaryn qarastyrýymyz kerek», - dedi QazAqparat tilshisine B.Sabanov.
Eske sala keteıik, budan buryn BQO-nyń ońtústik aýdandarynda mal azyǵyn daıyndaýǵa baılanysty qıyndyqtar týyndap otyrǵanyn jazǵan bolatynbyz.
Sondaı-aq sharýa qojalyǵynyń basshysy kıikten qorǵaý úshin egistik jerlerdi qorshaý kerektigin aıtty.
Dıqandardyń aıtýynsha, kıiktiń kóbeıýi egistikti ǵylymı negizde júrgizýge múmkindik bermeıdi.
