Batys Qazaqstanda kıik sany 70 myńnan asty
ORAL. QazAqparat - Batys Qazaqstan oblysynda kıik sany kóbeıip otyrǵanmen, ony zańsyz aýlaý qylmysy da tyıylar emes.
QR AShM Orman jáne ańshylyq sharýashylyǵy komıteti oblystyq orman jáne ańshylyq sharýashylyǵy aýmaqtyq ınspektsııasynyń basshysy Qaırat Qadeshevtiń aıtýynsha, bıyl 19 adamǵa qatysty 18 qylmystyq is qozǵalyp, sonyń 9-y boıynsha tergeý amaldary júrgizilýde. Sot úkimimen 5 adamǵa 1 jyldan 2 jylǵa deıin shartty merzim kesilse, bir adam 1,5 jylǵa bas bostandyǵynan aıyryldy. Janýarlar álemine keltirilgen zalal 13 mln. 374,5 myń teńgeni qurady. 3 mototsıkl, 6 ańshy myltyǵy, tasymaldanatyn 2 ratsııa, 13 kıik tóshkesi, 484 múıiz tárkilendi.
Kıikti zańsyz aýlaýshylar qatarynda jergilikti brakonerler ǵana emes, Aqtóbe, Atyraý, Jambyl oblystarynyń turǵyndary da kezdesedi.
Jalpy, kıik qorǵaý sharalary da kúsheıtilýde. Bıyl «Ohotzooprom» óndiristik birlestiginiń fılıaly Oralda (buryn Aqtóbege qaraıtyn) qurylyp, qazir onda 30 adam jumys jasaýda. Olar Qaztalov aýdanynda 15 kúnnen vahtalyq ádispen eńbek etedi. 10 tehnıkadan bólek, kıikti tikushaqpen baqylaýda. Kıik negizinen Qaztalov, Jánibek aýdandary aýmaǵyn mekendeıdi. 2010 jyly 12 myń, 2011 jyly 500 kıik qyrylǵanymen, jalpy sanynyń ósip kele jatqany qýantady. Mysaly, ótken jyly 51 myńdaı bolsa, bıylǵy kóktemgi sanaq kezinde shamamen 70200-ge jetti. Kúni búgin Qazaqstanda kıik eń kóp taralǵan aýmaq Batys Qazaqstan oblysy bolyp otyr.
«Kıikti múıizi úshin aýlaıtyny belgili. Ony sodan keıin zańsyz joldarmen Qytaıǵa asyrady. Qazirgi kezde sot sheshimine sáıkes tárkilengen múıizder joıylady. Bizdiń oıymyzsha, osyny farmatsevtıkalyq baǵytta jaratýdyń joldaryn izdestirý kerek sekildi. Osyǵan oraı zań tetikterin qarastyrý jóninde Aýyl sharýashylyǵy mınıstrligine usynys jasadyq», dedi Q.Qadeshev.
Aıta keteıik, kıikti zańsyz aýlaǵandardyń isi qazirgi tańda Qaztalov aýdandyq sotynda qaralý ústinde.
