Batys Qazaqstanda qatty jelden kolledj ǵımaratynyń shatyry ushyp ketti

ORAL. QazAqparat - Batys Qazaqstan oblysynda kúshti jelden kolledj ǵımaratynyń shatyry ushyp ketti, dep habarlaıdy QazAqparat tilshisi.

BQO TJ departamentiniń baspasóz qyzmetinen túsken málimetke qaraǵanda, oqıǵa 26 jeltoqsan kúni saǵat 09.30-da Aqjaıyq aýdany ortalyǵy Chapaev aýylynda boldy.

Ekpini sekýndyna 18 metrge deıin jetken jeldiń saldarynan Aqjaıyq agrarlyq-tehnıkalyq kolledji ornalasqan 1 qabatty ǵımarattyń 150 sharshy metr shatyry qulap túsken.

Ǵımarattyń jalpy aýdany - 763,5 sharshy metr.

Zardap shekkender joq.

Jergilikti atqarýshy organnyń arnaıy komıssııasy keltirilgen shyǵyn kólemin anyqtaý ústinde.

Atalmysh ǵımarat 1977 jyly salynyp, 2007 jyly kúrdeli jóndeýden ótkizilgen.

Eske sala keteıik, budan buryn Oralda kúshti jel bes qabatty turǵyn úıdiń shatyryn julyp áketkenin, BQO-da taǵy bir respýblıkalyq joldyń jabylǵanyn jazǵan bolatynbyz.