Batys Qazaqstanda karantınnen qashqan adamǵa aıyppul salyndy
ORAL. QazAqparat – Batys Qazaqstan oblysynda tótenshe jaǵdaı talabyn buzǵan 32 adam ákimshilik jaýapkershilikke tartyldy, dep habarlaıdy QazAqparat tilshisi.
BQO prokýratýrasynyń baspasóz qyzmetinen túsken málimetke qaraǵanda, sonyń ishinde 18-ine qatysty ákimshilik qamaqqa alý týraly sheshim qabyldandy.
Ákimshilik isterdiń kópshiligi saýda (dúkender) jáne qoǵamdyq tamaqtaný (meıramhana, dámhanalar) oryndary ıeleriniń tótenshe jaǵdaı kezinde engizilgen shekteýlerdi oryndamaýyna baılanysty bolyp tur.
Budan basqa, karantınge jatqyzylǵan adam statsıonardan óz betimen ketip qalǵandyqtan, oǵan ákimshilik aıyppul salyndy.
Medıtsınalyq buıymdardy zańsyz satýdyń tórt dereginiń joly kesildi.
Koronavırýsqa qatysty kórineý jalǵan aqparat taratqan úsh adamǵa qatysty QR QK 274-babyna sáıkes qylmystyq is qozǵalyp, tergeý amaldary júrgizilýde.
Oǵan kosa koronavırýsty juqtyrǵan adamnyń jeke málimetterin taratqany úshin bir qylmystyq is tirkeldi.
«Turǵyndar qaýipsizdigin qamtamasyz etý maqsatynda qabyldanǵan shekteý sharalaryn durys túsinip, densaýlyq saqtaý basqarmasy men polıtsııa qyzmetkerleriniń zańdy talaptaryn oryndaýdy suraımyz. Polıtsııanyń mundaı talaptaryn buzǵany úshin 40 AEK mólsherinde aıyppul nemese 10 kúnge qamaqqa alý jazasy kózdelgenin eske salamyz. Sanıtarlyq erejeler men gıgıenalyq normalardy buzǵany úshin QR Ákimshilik quqyq buzý kodeksi 425-babyna sáıkes 2000 AEK, al baqylaýshy organdardyń aktileri men talaptaryn oryndamaǵany úshin (462-bap) 500 AEK kóleminde aıyppul salynady. Mundaı nysandardyń qyzmeti de toqtatylady. Sondaı-aq shyndyqqa sáıkes kelmeıtin málimetterdi taratpaýǵa shaqyramyz», - dep habarlady BQO prokýratýrasy.
Eske sala keteıik, budan buryn BQO-da 92 adamnyń karantınde jatqanyn jazǵan bolatynbyz.
