Batys Qazaqstanda karantınge jabylǵan mektepter sany 13-ke jetti

ORAL. QazAqparat – Batys Qazaqstan oblysynda karantınge jabylǵan mektepter sany 13-ke jetti, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda málim etkenindeı, úshinshi toqsanda 11 qańtardan bastap 167 oqýshy koronavırýs juqtyrsa, sonyń 89-y dástúrli sıpatta, 78-i qashyqtan kóshti.

Oblysta 8-12 aqpan aralyǵynda qala men aýdandardyń bas memlekettik sanıtar dárigerleriniń qaýlysyna sáıkes 13 mektep 14 kúnge karantınge jabylyp, onda oqıtyn

shákirtter qashyqtan bilim alýda.

Al oqý jyly bastalǵannan beri barlyǵy 381 oqýshydan indet tabyldy.

Nurlybek Ermekulynyń sózine qaraǵanda, 1 aqpannan beri 889 adamnyń aýyrǵany anyqtalyp, olarmen qarym-qatynasta bolǵan 1056 adam medıtsınalyq baqylaýǵa alyndy.

Sońǵy aptada (5-11 aqpan) aldyńǵy aptamen (29 qańtar – 4 aqpan) salystyrǵanda, derttiń 11 paıyzǵa (613-ten 553-ke) tómendegeni baıqalady.

«Aqpanda syrqattanǵandardyń 259-y (29,1 paıyzy) – jumys isteıtin adamdar, 264-i (29,6 paıyzy) – zeınetkerler, 213-i (23,9 paıyzy) – jumyssyzdar, 58-i (6,5 paıyzy) – oqýshylar, 24-i (2,6 paıyzy) – muǵalimder, 29-y (3,4 paıyzy) medıtsına qyzmetkerleri bolyp otyr», dedi N.Mustaev.

Eske sala keteıik, budan buryn BQO-da karantın talabyn buzǵandarǵa 3 mln teńgeden astam aıyppul salynǵanyn, toǵyz mekteptiń karantınge jabylǵanyn, 1 myń adamǵa koronavırýs ekpesi salynǵanyn jazǵan bolatynbyz.

Sondaı-aq Batys Qazaqstanda juqpaly aýrýlar statsıonarynda jatqandar sany 350-den asty.