Batys Qazaqstanda karantındik talap kúsheıtilip, halyqtyń qozǵalysy shekteledi
ORAL. QazAqparat – Batys Qazaqstan oblysynda karantındik sharalar qaıta kúsheıtildi, dep habarlaıdy QazAqparat tilshisi.
BQO bas memlekettik sanıtar dárigeri Muhamǵalı Aryspaevtyń jańa qaýlysy 9 sáýirden bastap kúshine enedi.
Qaýlyǵa sáıkes eldi mekender aýmaǵynda halyqtyń qozǵalysy saǵat 00.00-den bastap 06.00-ge deıin shekteledi.
Oblys turǵyndary jeke kólikterimen shuǵyl jaǵdaı boıynsha medıtsınalyq mekemege, dárihanaǵa barýy kerek bolsa, sondaı-aq túngi aýysymda jumys isteıtin adamdar «109» telefony boıynsha ótinim qaldyrýy nemese http/www.STOPCOVID.KZ. saıtyna tirkelýi tıis qajet.
Kontıngenti 300 oqýshyǵa deıin aýyl mektepterinde bala sanyn 15-ten asyrmaı oqytýǵa ruqsat beriledi.
Bilim berý ákimshiliginiń sheshimi boıynsha sabaqtan tys ýaqytta 15 adamnan aspaıtyn toptarda jeke oqytýǵa bolady.
Jalpy bilim beretin mektepterde mektepaldy jáne 1-5 synyptar, halyqaralyq mektepterde 1-7 synyptarda bala sanyn 15-ten asyrmaı, aralas oqytýǵa bolady. Oqý bitiretin synyptar aptanyń alty kúni ishinde pánderdiń 70 paıyzyn shtattyq rejımde, 30 paıyzyn qashyqtan oqıdy. Munda da bala sany 15-ten aspaýy tıis.
Tehnıkalyq jáne kásiptik, orta bilimnen keıingi bilim berý uıymdarynda, joǵary jáne JOO-dan keıingi bilim berý uıymdarynda 1 kýrs stýdentteri sanıtarlyq-epıdemıologııalyq talaptardy saqtaı otyryp, praktıkalyq jáne zerthanalyq sabaqtardy ǵana oqyp, qashyqtan bilim alýǵa kóshiriledi.
Saýda úıleri men ortalyqtary jumys kúnderi saǵat 10.00-den 21.00-ge deıin, senbide 10.00-den 17.00-ge deıin ashyq bolady. Jeksenbi kúnderi jumys jasamaıdy.
Saǵat 09.00-den 18.00-ge deıin azyq-túliktik emes taýarlar satatyn dúkender de jeksenbi kúni qyzmetin toqtatady.
Azyq-túlik dúkenderi (sonyń ishinde mınımarket, alkomarket, syra satatyn oryndar) saǵat 08.00-den 23.00-ge deıin kókónis pen jemis-jıdekti qospaǵanda, azyq-túlik ónimderin tek ólshep oralǵan kúıinde satady.
Eske sala keteıik, budan buryn Batys Qazaqstanda karantın sharalary kúsheıtilgenin, 7 myń adam koronavırýsqa qarsy ekpe saldyrǵanyn jazǵan bolatynbyz.
