Batys Qazaqstanda karantındik shekteý sharalary jeńildetildi
ORAL. QazAqparat – Batys Qazaqstan oblysynda karantındik shekteý sharalary jeńildetildi. Bul týraly BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaev brıfıngte málim etti, dep habarlaıdy QazAqparat tilshisi.
Onyń aıtýynsha, bul sharalar kezeń-kezeńmen júzege asyrylatyn bolady.
Sonymen qatar karantındik sharalar 25 mamyrǵa deıin saqtalady.
Birinshi kezeńde, ıaǵnı 12 mamyrdan bastap aýdanaralyq blokposttar alynady. Reseımen jáne kórshiles oblystarmen shekarada, Oral qalasy men Bórli aýdanynda qoıylǵan blokposttar ǵana qalady. Turǵyndardyń araqashyqtyqty saqtaı otyryp, skverler men jaǵajaılarda serýendeýine ruqsat beriledi.
Sondaı-aq óńirdegi barlyq azyq-túlik bazarlary ashylyp, tańǵy saǵat 09.00-den 16.00-ge deıin jumys isteı alady. Alaıda olarda barlyq sanıtarlyq-dezınfektsııalyq talaptar qatań saqtalýy tıis. Bazarǵa kelýshiler, satýshylar maska, qolǵap kııýi kerek.
Sol sekildi halyqqa qyzmet kórsetý ortalyqtary da jumys isteı bastaıdy. Munda da sanıtarlyq talaptar saqtalyp, qyzmet kórsetý ornyna bes adamnan artyq kirmeýi qajet.
Bıznes ortalyqtary men olardyń ofısteri jumystaryna kirisedi.
Koronavırýstyń ósý deńgeıi 5 paıyzdan aspaǵan jaǵdaıda 18 mamyrda alańy 2 myń sharshy metrdi quraıtyn iri saýda ortalyqtary men azyq-túliktik emes taýarlar satatyn bazarlardy da ashý kózdelýde. Monıtorıngtik toptyń tekserýinen keıin barlyq talaptyń saqtalýymen balabaqsha mekemeleri de búldirshinderdi qabyldaı alady.
Al ósý deńgeıi 2 paıyzdan aspaǵan jaǵdaıda fıtnes ortalyqtary, monsha, meıramhana, qoǵamdyq tamaqtandyrý oryndaryna kezek keledi.
Sanıtarlyq talaptarǵa sáıkes áýe reısteri de birtindep qalpyna keledi, bul rette ushatyn adamdar test tapsyrmaıdy.
«Oblysta jaǵdaı áli de turaqsyz. Ásirese, Reseıden, Teńiz ken ornynan kelgender arasynan aýrýdyń jıi anyqtalýy alańdatyp otyr. Medıtsına mekemelerimen, oblystyq densaýlyq saqtaý basqarmasymen birge osyny tómendetý, naýqastardy emdeý, indettiń aldyn alý baǵytyndaǵy jumystar jalǵasýda», - dedi M.Aryspaev.
