Batys Qazaqstanda karantındik sharalar jeńildetiledi
ORAL. QazAqparat – Batys Qazaqstan oblysynda karantındik shekteý sharalary kezeń-kezeńmen jeńildetiledi, dep habarlaıdy QazAqparat tilshisi.
BQO bas memlekettik sanıtar dárigeri Muhamǵalı Aryspaevtyń jańa qaýlysy 17 tamyzdan bastap kúshine enedi.
Atap aıtqanda, áleýmettik qashyqtyqty saqtaı otyryp, úsh adamnan aspaıtyn toptarmen nemese bir otbasy múshelerimen skver, alańdarǵa, jaǵalaýǵa, qalalyq mádenıet jáne demalys saıabaǵyna, basqa da demalys oryndaryna barýǵa ruqsat berildi.
Ashyq aýada jeke jáne toptyq (5 adamnan aspaıtyn) jattyǵý jasaýǵa bolady.
Ulttyq qurama músheleri, klýbtar sport bazalarynda (30 adamnan asyrmaı) turyp, sheberlikterin shyńdaı alady.
Ashyq aýada attraktsıondar da jumys isteıdi.
Saýda úıleri men ortalyqtary, saýda jelileri, jabyq azyq-túlik jáne azyq-túliktik emes bazarlar, sulýlyq salondary, shashtaraz, kosmetologııalyq qyzmet nysandary, ЅRA ortalyqtary (salondary), fıtnes ortalyqtar, sport jáne jattyǵý zaldary, sporttyq-saýyqtyrý nysandary, monsha, saýnalar, balalar men eresekterge arnalǵan bilim berý ortalyqtary, balalarǵa arnalǵan túzetý kabınetteri, mektepke deıingi balalar uıymdarynyń kezekshi toptary, qoǵamdyq tamaqtaný nysandary óz qyzmetterin qaıta bastaıdy.
Esesine banketter, úılený toılary, mereıtoı, saltanatty, otbasylyq jáne basqa kópshilik is-sharalardy ótkizýge salynǵan tyıym óz kúshinde qalady.
Óńirler arasynda jolaýshylar tasymaldaıtyn avtobýstar júrmeıdi.
Sol sekildi saýyqtyrý jáne mektep janyndaǵy lagerlerdiń, basseınderdiń, jaǵajaılardyń; barlyq oıyn-saýyq nysandarynyń (ashyq aýadaǵy attraktsıondardy qospaǵanda), kınoteatrlardyń, fýdkorttardyń, banket zaldarynyń, oıyn alańdarynyń barlyq túrleriniń (aýlalardaǵyny qospaǵanda); túngi klýbtardyń, barlardyń, karaokeniń, kompıýterlik jáne oıyn klýbtarynyń; kalıandyq, býkmekerlik keńselerdiń, keıterıngtik qyzmetter kórsetýdiń jáne merekelerdi uıymdastyrý jónindegi qyzmetterdiń; dinı nysandardyń, sondaı-aq barlyq mádenıet nysandarynyń (teatrlardyń, kontsert zaldarynyń, murajaılardyń, kórmelerdiń, forýmdardyń); kezekshi toptardy qospaǵanda, menshik nysanyna qaramastan, mektepke deıingi balalar mekemeleriniń qyzmeti toqtatyla turady.
Jumys ýaqyty men rejımi boıynsha shekteýler belgilendi.
Sanıtarlyq talaptardy saqtaı otyryp qoǵamdyq kólikter saǵat 07.00-den 23.00-ge deıin júredi. Al senbi, jeksenbi (22, 23, 29, 30 tamyz) kúnderi avtobýstar saıajaı baǵyttaryna (saǵat 07.00-den 10.00-ge deıin, saǵat 17.00-den 23.00-ge deıin) ǵana qatynaı alady.
Osyǵan deıin turǵyndarǵa túngi saǵat 23.00-den tańǵy 06.00-ge deıin jeke kólikterimen júrýge salynǵan tyıym alynyp tastaldy.
Eske sala keteıik, budan buryn Batys Qazaqstan oblysynda shekteý sharalary uzartylǵanyn jazǵan bolatynbyz.
