Batys Qazaqstanda karantın talabyn buzǵandarǵa 1 mln teńge aıyppul salyndy

ORAL. QazAqparat – Batys Qazaqstan oblysynda mamyr aıynda karantın talaptaryn buzǵandarǵa 1 mln astam teńge aıyppul salyndy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, osy aıda monıtorıngtik toptar 221 reıd júrgizip, 1176 nysandy qamtydy.

Barlyǵy 27 nysanda karantın talabyn buzý faktisi anyqtaldy. 24 hattama toltyrylyp, 1 mln 50,120 myń teńge aıyppul salyndy.

Nurlybek Ermekulynyń sózine qaraǵanda, 1 mamyrdan beri 2898 adamnyń koronavırýsty juqtyrǵany anyqtaldy.

Sonyń 55,9 paıyzy (1622) JRVI belgileri boıynsha tekserilse, 33,4 paıyzy (969) buryn aýyrǵandarmen qarym-qatynasta bolǵan.

Sońǵy aptada (21-27 mamyr) aldyńǵymen (14-20 mamyr) salystyrǵanda, indet juqtyrý kórsetkishi 13,1 paıyzǵa (721-den 626-ǵa) azaıdy.

Mamyr aıynda memlekettik shekaradan 26761 adam ótse, sonyń 6284-i – jolaýshylar. Anyqtamasyz ótken 366 jolaýshynyń bireýinen indet tabyldy. Sondaı-aq halyqaralyq júk tasymalymen aınalysatyn 14072 júrgizýshiniń 2424-inde anyqtama bolǵan joq. Bulardyń 10-y koronavırýs juqtyrǵan bolyp shyqty.

«Qazirgi tańda «Ashyq« qosymshasymen oblys boıynsha barlyǵy 391 nysan jumys isteıdi. 1 mamyrdan bastap «Ashyq« jobasyna qatysatyn nysandarǵa sary, qyzyl mártebesi bar 136 adam kelgen. Atap aıtqanda, Oralda qyzyl mártebesi bar 48, sarymen 69, Aqsaı qalasynda qyzylmen 9, sarymen 10 adam anyqtaldy», dedi N.Mustaev.

Eske sala keteıik, budan buryn Batys Qazaqstanda 400-den astam naýqastyń ınfektsııalyq statsıonarlarda emdelip jatqanyn jazǵan bolatynbyz.