Batys Qazaqstanda qar tazalaýǵa stýdentter men eriktiler tartylýda
ORAL. QazAqparat - Batys Qazaqstanda sý tasqynyna qarsy sharalarǵa áskerı qyzmetkerler, stýdentter men eriktiler jumyldyrylýda. Bul týraly BQO ákimdiginde ótken jedel shtab otyrysynda aıtyldy, dep habarlaıdy QazAqparat tilshisi.
BQO Tótenshe jaǵdaılar departamentiniń basshysy Jasulan Jumashevtiń sózine qaraǵanda, negizgi qaýip ózenderden emes, qar sýy men jaýyn-shashynnyń kóptiginen týyndap otyr.
J.Jumashev málim etkenindeı, ózender men sý qoımalarynda muzdyń qalyńdyǵynda ózgeris joq. Jaıyqta 35 sm, Derkólde 62 sm, basqa shaǵyn ózenderde muzdyń beti jipsı bastaǵanymen, keı jerlerde 74 santımetrge jetedi. Qardyń bıiktigi Tasqala aýdanynda - 65 sm. Al tońnyń qalyńdyǵy Shyńǵyrlaýda 139 santımetrge jetse, Tasqalada 51 sm ǵana. Aqjaıyq, Qaztalov sııaqty aýdandarda qar erip, topyraq jumsara bastady, buǵan ońtústik-shyǵystan soqqan jel áser etýde. Oblys ózenderinde osy aıdyń basynan beri 9886 oıyq jasaldy. Barlyǵy 203590 sharshy metr muz bosatyldy. Syrym, Qaratóbe aýdandary men Oralda 1016 tekshe metr sý soryldy. Sý júretin jerlerde tal-terekter de kesilip, jınalýda. Respýblıkalyq mańyzy bar joldarda sý ótkizetin 459 qubyrdyń 402-si tazartyldy.
«Qazgıdromet» RMK málimetine qaraǵanda, sársenbiden bastap kún jylynyp, temperatýra túnde de kóteriledi.
«Qar shyǵarýmen budan da belsendirek aınalysýǵa tıispiz. Turǵyndardy, ásirese, jastardy uıymdastyryp, aýla-aýmaqtardy qardan tazalaýǵa jumyldyrý kerek», - dedi oblys ákimi Altaı Kólginov.
Otyrys barysynda aýdandar men Oral qalasy ákimderiniń esebi tyńdaldy. Aıtalyq, qala ákimi Murat Muqaevtyń sózine qaraǵanda, qar shyǵarýǵa barlyq tehnıka jumyldyrylǵan. Kún saıyn 350 adam jumys jasaýda. Oǵan stýdentter men eriktiler tartylýda.
Óńir basshysynyń atap ótkenindeı, qaýipti barynsha seıiltý úshin muz kesý sııaqty jumystardy jalǵastyrý kerek. Sondyqtan kóktemgi sý tasqyny kezinde kúsheıtilgen jumys tártibine kóshý týraly sheshim qabyldandy.
