Batys Qazaqstanda qar qursaýynda qalǵan turǵyndar qutqaryldy
ORAL. QazAqparat - Batys Qazaqstan oblysynda qar qursaýynda qalǵan turǵyndar qutqaryldy, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa 15 qańtar kúni boldy.
Saǵat 15.30-da eki turǵyn «Largýs» avtokóligimen Qaztalov aýdany Jalpaqtal aýylynan Jańaqala aýdany Másteksaı aýylyna bet alǵan. Alaıda olar aýa raıynyń qolaısyzdyǵy saldarynan jolda qar qursaýynda qaldy. Dalada uıaly telefon baılanysynyń álsizdigine baılanysty TJ departamentine kómek suraǵan habar saǵat 20.30-da tústi. Sol boıda qutqarýshylar jolǵa shyqty. Adasyp ketkender 16 qańtarda saǵat 00.30-da tabyldy. Olar medıtsınalyq kómekti qajetsinbedi.
BQO TJ departamenti asa qajet bolmasa, alys jolǵa shyqpaý kerektigin oblys turǵyndarynyń esine salady.
