Batys Qazaqstanda qandas mártebesin alýshylar qatary kóbeıdi
«Azamattarǵa arnalǵan úkimet» memlekettik korporatsııasy BQO boıynsha fılıalynyń dırektory Nádir Qurymbaevtyń óńirlik kommýnıkatsııalar qyzmeti alańynda ótken brıfıngte málim etkenindeı, soǵan baılanysty Oral qalasynda №1 HQO bóliminde qandastarǵa qyzmet kórsetetin arnaıy tereze ashyldy.
-Munda qandas baýyrlarymyz kelip, barlyq qujattary boıynsha keńes alyp, qujattaryn tapsyra alady. Jyl basynan beri 215 adam HQO arqyly qandas mártebesine ótinish tapsyrǵan, - deıdi Nádir Shamuratuly.
Onyń aıtýynsha, oblys boıynsha memlekettik qyzmetterdi onlaın túrde alýshylar qatary kóbeıip keledi. Bıylǵy 2022 jyldyń 9 aıynyń qorytyndysy boıynsha halyqqa qyzmet kórsetý ortalyqtary arqyly 674 857 memlekettik qyzmet, sonyń ishinde 287 348 (42 paıyz) ózine-ózi qyzmet kórsetý sektorlary arqyly kórsetilgen. Bul – memqyzmetterdi HQO-ǵa kelmeı-aq, ózdiginen eGov.kz portaly, egov mobile mobıldi qosymshasy arqyly kórsetilip jatqan qyzmetterdi qospaǵandaǵy kórsetkish.
Asa suranysqa ıe memlekettik qyzmetter: elektrondy sandyq qoltańba berý, jeke kýálikter men pasporttar, júrgizýshi kýáligi, jyljymaıtyn múlik pen avtokólikterdi tirkeý.
«SMS arqyly rásimdeýge bolatyn qyzmetter sany artty. SMS-habarlama arqyly 45 memlekettik qyzmettiń nátıjesi týraly habarlaıtyn jańa servıs iske qosyldy. Endi klıentterge qyzmettiń nátıjesin bilý úshin HQO-ǵa ekinshi ret barýdyń qajeti joq. Klıentke siltemesi bar SMS-habarlama keledi, ol arqyly daıyn qujatty júkteýge jáne qajet bolǵan jaǵdaıda ony basyp shyǵarýǵa bolady. Bul júıe klıentterdiń ýaqytyn edáýir únemdeıtini sózsiz. Tizimge engen memlekettik qyzmetterdiń arasynda bala týýy jáne onyń kútimi boıynsha áleýmettik tólemder taǵaıyndaý, balany mektepke deıingi mekemelerge kezekke qoıý, asyraýshysynan aıyrylǵan jaǵdaıdaǵy járdemaqy taǵaıyndaý, eńbek mıgranttary ruqsatyn rásimdeý nemese uzartý jáne sporttyq ataqtar berý syndy memlekettik qyzmetter bar. Shetel azamattaryna da SMS-habarlama arqyly qyzmet kórsetiledi», dedi N.Qurymbaev.
