Batys Qazaqstanda qalyń tumanǵa baılanysty jol jabyldy
ORAL. QazAqparat – Batys Qazaqstan oblysynda qalyń tumanǵa baılanysty respýblıkalyq jol jabyldy, dep habarlaıdy QazAqparat tilshisi.
«QazAvtoJol» kompanııasy BQO fılıalynyń málimeti boıynsha aýa raıynyń nasharlaýyna baılanysty 4 aqpan kúngi saǵat 22.00-den bastap respýblıkalyq « Oral-Atyraý» (Oraldan Chapaev aýylyna deıin) kúre joly barlyq avtokólik túrleri úshin jabyldy.
Bul týraly BQO TJ departamenti habarlap, eskertý jarııalanǵanyn jetkizdi.
Sonymen qatar «Qazgıdromet» RMK-nyń málimeti boıynsha 5 aqpan kúni óńirdiń keı jerlerinde tuman túsip, kóktaıǵaq bolýy yqtımal. Osyǵan oraı BQO polıtsııa departamenti asa qajettilik týyndamasa, turǵyndarǵa alys jolǵa shyqpaı, saq bolý kerektigin eskertedi.
Eske sala keteıik, budan buryn Batys Qazaqstanda jolda qalǵan 7 adamnyń qutqarylǵanyn, Oralda aýa raıyna baılanysty birqatar shaǵynaýdanda sý berý toqtatylǵanyn jazǵan bolatynbyz.
