Batys Qazaqstanda iri dúken órtenip ketti
ORAL. QazAqparat – Batys Qazaqstan oblysynda iri dúken órtendi, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 26 tamyz kúni Syrym aýdany Jympıty aýylynda oryn aldy.
Saǵat 22.45-te Alashorda kóshesi 21-mekenjaıynda bir qabatty «Everest» dúkeniniń shatyrynan órt shyqqany jóninde habar tústi. Onyń aýmaǵy shamamen 420 sharshy metrdi qamtydy. Ǵımarattyń tóbesi opyrylyp túsken.
Órt 27 tamyz kúngi saǵat 01.49-da oqshaýlanyp, 03.10-da tolyqtaı sóndirildi.
Zardap shekkender joq.
Qazirgi kezde órttiń shyǵý sebebi, keltirilgen shyǵyn, kináli adamdar anyqtalýda.
Eske sala keteıik, budan buryn Batys Qazaqstanda eki kúnde 50 tonnaǵa jýyq pishenniń órtenip ketkenin jazǵan bolatynbyz.
