Batys Qazaqstanda eriktiler 20 myńǵa jýyq otbasyǵa qolushyn sozdy
BQO jastar saıasaty máseleleri basqarmasy basshysynyń mindetin atqarýshy Nurhat Orashtyń óńirlik kommýnıkatsııalar qyzmeti alańynda ótken brıfıngide málim etkenindeı, bıyl eriktiler jylyna baılanysty jastardyń negizgi kúshi volonterlik qyzmetke jumyldyryldy.
Oblysta 60-qa jýyq uıymǵa kiretin 10 myńnan astam volonter bar.
Onyń sózine qaraǵanda, bıyl eriktiler men volonterlik uıymdardy biriktirý maqsatynda 15 baǵyttan («Medıtsına», «Ekologııa», «Áleýmettik», «Medıa», «Oqıǵaly», «Janýarlarmen», «TJ volonterlik», «Mádenı», «Donorlyq», «Sporttyq», «PRO BONO jáne zııatkerlik volonterlik», «Korporatıvtik», «Vırtýaldi» jáne «Etno volonterlik») turatyn volunteer07.kz aqparattyq saıty iske qosyldy.
Oblys boıynsha barlyǵy 19412 otbasyǵa járdem berilse, sonyń ishinde 12694 otbasyǵa (6952-si qala boıynsha, 5742-si aýdandarda) tegin azyq-túlik sebetteri jetkizildi.
Sondaı-aq 3693 otbasyǵa turǵyndardyń óz qarajattary esebinen azyq-túlik aparyldy. 478 otbasyǵa dári-dármekten qoldaý kórsetildi. 1047 otbasynyń úı jumystary jasaldy. Eriktiler 168 otbasyǵa tótenshe jaǵdaı kezinde 42500 teńge kóleminde áleýmettik járdemaqy alýǵa ótinim berýge kómektesti. Al 1332 otbasyǵa demeýshilerdiń qoldaýymen 16620 lıtr aýyz sý aparyldy.
Qoǵamdyq qaýipsizdikti qamtamasyz etý maqsatynda quqyq qorǵaý organdarymen birlesip, volonterlar 1206 reıd ótkizdi.
Eriktilerdiń kúshimen 350 myń maska (80 myńy qoldan tigilse, 270 myńy demeýshiler esebinen) tegin taratyldy.
«Volonterlik jobalar bıylǵy jylmen aıaqtalmaıdy. Kelesi jyly da jalǵasyn tabady. Onyń ústine indettiń qaýpi áli seıilmeı tur. Qazirgi tańda da eriktiler koronavırýspen kúrestiń aldyńǵy shebinde júr», dedi QazAqparat tilshisine Nurhat Orash.
Eske sala keteıik, budan buryn BQO-da memqyzmetshilerdiń jańajyldyq korporatıvtiń ornyna qaıyrymdylyq jasaǵanyn jazǵan bolatynbyz.
