Batys Qazaqstanda er adamdy óltirgen kúdikti ustaldy
ORAL. QazAqparat – Batys Qazaqstan oblysynda er adamdy óltirgen kúdikti ustaldy, dep habarlaıdy QazAqparat tilshisi.
Budan buryn jazǵanymyzdaı, Aqsaı qalasyndaǵy jaldamaly páterdiń birinen 46 jastaǵy er adamnyń denesi tabylǵan bolatyn.
BQO polıtsııa departamentiniń resmı ókili Bolatbek Belgibekovtiń málim etkenindeı, asa aýyr qylmysty ashý úshin jeke quram jumyldyryldy. Sonyń nátıjesinde qylmystyń izi sýymaı ashyldy.
Jedel izdestirý sharalary barysynda 1981 jylǵy kúdikti Oral qalasynda qolǵa tústi. Qazirgi kezde ol ýaqytsha oqshaýlaý ızolıatorynda otyr.
Kúdikti marqummen jaqsy tanys bolǵan. Buryn ekeýi de qylmystyq jaýapkershilikke tartylǵan.
Atalǵan oqıǵa boıynsha QR QK 99-baby 1-bóligine sáıkes tergeý amaldary júrgizilýde.
