Batys Qazaqstanda Eńsep Dosqalıevti eske alýǵa arnalǵan dástúrli týrnır márege jetti
ORAL. QazAqparat - Qaratóbe aýdanynda ataqty palýan, qazaq kúresinen Semeı qalasynda 1939 jyly respýblıkanyń tuńǵysh absolıýtti chempıony atanǵan, keıin Ekinshi dúnıejúzilik soǵysta erlikpen qaza tapqan Eńsep Dosqalıevti (1905-1944) eske alýǵa arnalǵan ІІІ respýblıkalyq týrnır márege jetti, dep habarlaıdy «QazAqparat» tilshisi.
Jarystyń ashylý rásiminde aýdan ákimi Janat Asantaev, BQO dene shynyqtyrý jáne sport basqarmasynyń basshysy Ásııa Amanbaeva qazaq kúresiniń tarıhynda Eńsep Dosqalıevteı palýannyń esimi umytylmaıtynyn, Elbasynyń «Rýhanı jańǵyrý» baǵdarlamasyna sáıkes dástúrli týrnırdiń aldaǵy ýaqytta da uıymdastyrylatynyn jetkizdi. 
Jarysqa Aqtóbe, Atyraý, Batys Qazaqstan oblystarynan jáne Oral qalasy men óńirdiń Bókeı ordasy, Qaztalov, Bórli, Syrym, Qaratóbe aýdandarynan seksenge jýyq palýan qatysyp, segiz salmaq dárejesi boıynsha baq synady.
Týrnır qorytyndysynda óz salmaǵy boıynsha Shúrmen Baýyrjan (55 kg), Maǵjan Serikov (60 kg, ekeýi de Qaratóbe aýdanynan), Nurdáýlet Járdemov (66 kg, Oral), Aıbol Orazǵalıev (74 kg, Syrym), Dýlat Baıgenov (82 kg, Atyraý), Nurymjan Ǵabbasov (90 kg, Syrym), Shyńǵys Shoqpytov (100 kg), Nursultan Imanǵazın (+100 kg, ekeýi de Aqtóbeden) chempıon atandy. Jarys jeńimpaz-júldegerleri dıplomdarmen, syılyqtarmen marapattaldy.
«Túıe palýan» ataǵyn jeńip alýǵa 13 úmitker talasty. Solardyń arasynan N.Imanǵazın úzdik shyǵyp, bas júldege (250 myń teńge) ıe boldy. Qaztalov aýdanynyń atynan kúresken Ernazar Hamzın ekinshi, bórlilik Temirlan Kólbaı úshinshi orynǵa kóterildi.
«Joǵary deńgeıde ótken Qaratóbedegi dástúrli týrnırde top jarǵanyma qýanyshtymyn. Osydan buryn Syrym aýdanynda ótken «Alash barysy» týrnırinde utylyp, jeńiske jete almap edim. Osy joly sonyń qarymtasyn qaıyrdym deı alamyn. Qarsylastarym osal bolǵan joq. Olardyń saıysqa jaqsy daıyndyqpen kelgeni kórinip-aq turdy. Ózim «Qazaqstan barysy» týrnırine tórt márte qatystym. Túrli deńgeıdegi saıystardan quralaqan qalǵanym joq. Qazaqstan kýbogyn jeńip aldym. Qazir Aqtóbe oblysynyń Qandyaǵash qalasyndaǵy balalar men jasóspirimder sport mektebinde jattyqtyrýshy bolyp qyzmet etemin. Dzıýdo, sambo jáne qazaq kúresi boıynsha QR sport sheberimin», dedi Nursultan Imanǵazın.
