Batys Qazaqstanda «Elim meniń» jastar koalıtsııasy qurylmaq
ORAL. QazAqparat - «Rýhanı jańǵyrý» baǵdarlamasyn júzege asyrýǵa jastar belsene aralasýy kerek. Bul týraly Oralda «Bolashaqqa baǵdar: jastardyń jetistik joly» atty jastar forýmynda aıtyldy, dep habarlaıdy «QazAqparat» tilshisi.
Jıynǵa respýblıkalyq jáne aımaqtyq jastar uıymdary kóshbasshylary, Atyraý, Aqtóbe, Mańǵystaý oblystary jastarynyń ókilderi, JOO ózin-ózi basqarý uıymdarynyń músheleri, jas jýrnalıster, ataqty sportshylar men tanymal blogerler qatysty.
Elbasy Nursultan Nazarbaevtyń «Jas Otan» jastar qanatynyń 2008 jyly ótken І sezinde bergen tapsyrmasyna sáıkes «Jastar - Otanǵa!» lageri jyl saıyn uıymdastyrylyp keledi. Elimizdegi belsendi jastardyń basyn biriktiretin lager jumysyna 2009 jyldan beri 2 myńnan astam adam qatysty.
Osy lager aıasynda búgin ótken jıynǵa qurmetti meıman retinde qatysqan oblys ákimi Altaı Kólginov «Rýhanı jańǵyrý» baǵdarlamasyn júzege asyrýǵa baılanysty jastardyń pikirleri men usynys-tilekterin eskerýdiń mańyzy erekshe ekendigin jetkizdi. Rýhanı jańǵyrý - bizdiń tarıhymyz, mádenıetimiz jáne bolashaǵymyz. Elbasy álemdegi 100 úzdik kitaptyń memlekettik tilge aýdarylýy týraly kókeıkesti máseleni kóterdi. Shyn máninde dúnıe júzine belgili ǵalymdardyń asa qundy eńbekteri qazaq tilinde oqıtyn jastar úshin qoljetimdi dúnıege aınalsa, munyń paıdasy mol bolary anyq. Sol sekildi Qazaqstannyń jańa esimderin anyqtaýdy kózdeıtin «100 jańa esim» jobasy bastaý aldy. HHІ ǵasyr - jańa tehnologııalar dáýiri. Sondyqtan ýaqyt kóshine ilese bilý kerek. Qazaqstanda jastardyń ósýi úshin barlyq jaǵdaı jasalýda. Degenmen qala men aýyl jastary arasynda aıyrmashylyq bar. Mysaly, ǵalamtor baılanysy jetpeı otyrǵan shalǵaı eldi mekender bar. Qazirgi kezde QR Aqparat jáne kommýnıkatsııa mınıstrligimen 1900 eldi mekendi ǵalamtorǵa qosý jóninde kelissóz júrgizilýde, sonyń 350-i - Batys Qazaqstandaǵy aýyldar.
Forýmda sondaı-aq «Qazaqstan - 2050» jalpyulttyq qozǵalysynyń tóraǵasy Muhtar Mankeev «Rýhanı jańǵyrý» baǵdarlamasyn júzege asyrý tóńiregindegi óz oılarymen bólisti. «Rýhanı jańǵyrýsyz el bolashaǵyn kózge elestetý múmkin emes. «Týǵan jer» baǵdarlamasyn júzege asyrý baǵytynda jańa jobalar qolǵa alyndy. Aıtalyq, «Qazaqstannyń tarıhı jerleri» arqyly motojoryq uıymdastyryldy. 8500 shaqyrymdy júrip ótetin joryq qorytyndysynda Qazaqstannyń eń ádemi, týrıster úshin tartymdy 25 jeri anyqtalatyn bolady. Sonymen qatar qazaqstandyq pragmatızmniń jańa úlgisin qalyptastyrý úshin «Qazaqstan - 2050» qozǵalysyna qatysyp qoıý az. Bizder óńirlerge shyǵyp, jergilikti jerlerde birlesip jumys júrgizemiz. Jahandaný jóninde kóp aıtylýda. Jastar buǵan da qatysýy kerek. Sol sekildi bıyl aýyl jáne qala jastary arasyndaǵy aıyrmashylyqty qysqartý baǵytynda jańa joba qolǵa alynbaq. Sheteldik pedagogtar men «Bolashaq» baǵdarlamasynyń túlekteri bir-eki aıǵa aýyldyq jerlerge baryp, semınar-trenıng ótkizip, tájirıbe almasatyn bolady», dedi M.Mankeev.
Shara barysynda oblystaǵy jastar uıymdary atynan sóz alǵan Jánibek aýdandyq «Aqbastaý» jastar qoǵamdyq birlestiginiń tóraǵasy Rýslan Nuralıev óńirde «Rýhanı jańǵyrý» baǵdarlamasyn iske asyrýǵa jastardy keńinen tartý maqsatynda «Elim meniń» jastar koalıtsııasyn qurýdy usyndy. Bul usynys forýmǵa qatysýshylar tarapynan qoldaý tapty.
