Batys Qazaqstanda elektr qýatyn óndirý 4,1 paıyzǵa ósip otyr

ORAL. QazAqparat – Batys Qazaqstan oblysynda elektr qýatyn óndirý 4,1 paıyzǵa ósip otyr, dep habarlaıdy QazAqparat tilshisi.

BQO energetıka jáne turǵyn-úı kommýnaldyq sharýashylyǵy basqarmasy basshysynyń orynbasary Mırjan Nurtazıevtyń óńirlik kommýnıkatsııalar qyzmeti alańynda ótken brıfıngide málim etkenindeı, bıylǵy toǵyz aıda 1682,8 mln kVt saǵat elektr qýaty óndirildi.

Onyń sózine qaraǵanda, oblys qajettiligi – 1702,1 mln kVt saǵat. Jyl basynan beri Reseı Federatsııasynan 30,2 mln kVt saǵat (1,7 paıyz) jáne «KUS» JShS-dan (Atyraý) 79,1 mln kVt saǵat elektr qýaty jetkizilgen. Ótken jyldyń osy kezeńimen salystyrǵanda, elektr qýatyn óndirý 104,1 paıyzdy qurap otyr.

«Óńirde tolyq energetıkalyq táýelsizdikti qamtamasyz etý maqsatyndaǵy jumystar jalǵasatyn bolady. Aldaǵy jyly Oral jylý-elektr ortalyǵynda týrboagregatty 12 MVt-ǵa aýystyrý esebinen elektr qýatyn óndirý molaıa túspek.

Sondaı-aq 2025 jyly «Batys Paýer» JShS gaztýrbınaly elektr stansasynyń ekinshi kezeńi (qýaty 390 MVt) iske qosylmaqshy. Bul oblystyń damýy, jańa óndiris oryndary men áleýmettik nysandar úshin qýat kózderin qalyptastyrýǵa múmkindik beredi», dedi M.Nurtazıev.

«Batys Paýer» JShS-nyń qýaty 100 MVt gaztýrbınaly elektr stansasy 2016 jyly iske qosylǵan bolatyn.

Eske sala keteıik, budan buryn BQO-da «Nurly jol» memlekettik baǵdarlamasy aıasynda eki respýblıkalyq joldyń jańǵyrtylatynyn jazǵan bolatynbyz.