Batys Qazaqstanda ekologııalyq quqyqbuzýshylyq 2,5 esege ósip otyr
ORAL. QazAqparat - Batys Qazaqstan oblysynda sońǵy jyldary ekologııalyq quqyqbuzýshylyq 2,5 esege ósip otyr. Bul týraly Oral qalasynda ótken «Uralsk Green Forum» І halyqaralyq ekologııalyq forýmynda málim etildi, dep habarlaıdy «QazAqparat» tilshisi.
«Qarashyǵanaq Petrolıým Opereıtıng b.v.» («QPO b.v.») kompanııasy, QR Energetıka mınıstrligi, BQO ákimdigi, oblystyq mamandandyrylǵan tabıǵat qorǵaý prokýratýrasynyń bastamasy jáne qoldaýymen uıymdastyrylǵan jıynǵa 150-den astam delegat qatysyp, onda qorshaǵan ortany qorǵaý, jasyl tehnologııalardy engizý, energııany únemdeý men onyń tıimdiligin arttyrý, qaldyqtardy óńdeý máseleleri talqylandy.
Forýmǵa qatysqan Batys Qazaqstan oblysynyń ákimi Altaı Kólginov osynaý halyqaralyq jıynnyń «EKSPO - 2017» kórmesi qarsańynda Oralda uıymdastyrylyp otyrǵandyǵyn jetkizip, ony dástúrli túrde, jyl saıyn ótkizý týraly usynys jasady.
Onyń atap ótkenindeı, Elbasy Nursultan Nazarbaev tabıǵatty tıimdi paıdalaný jáne ekologııalyq jaǵdaıdy jaqsartýǵa udaıy kóńil bólip keledi. Memleket basshysynyń bastamasymen elimizde «Jasyl ekonomıkaǵa» kóshýdiń tujyrymdamasy jasaldy. Klımattyń ózgerýin boldyrmaýǵa baǵyttalǵan kelisimderge qol qoıylyp, parnıktik gaz shyǵaryndylaryn retteýdiń ulttyq júıesi quryldy. Túptep kelgende, tabıǵat baılyqtaryn tıimdi paıdalanyp, ortaq ıgilikke aınaldyrý - basty mindet.
Osy oraıda atalmysh ekologııalyq forým da jer qoınaýyn paıdalanýshylar men ýákiletti organdar arasynda ózara baılanysty ornyqtyra túsýge septigin tıgizse, ıgi.
«QPO b.v.» kompanııasynyń bas dırektory Renato Marolı ekologııalyq forýmnyń memleket pen bıznes arasynda ashyq pikirtalas alańyna aınalatynyna senim bildirdi.
Oblys prokýrory Saparbek Nurpeıisovtiń málim etkenindeı, sońǵy úsh jylda qorshaǵan ortaǵa zalal keltirgenderden 18 mlrd. teńge óndirildi. Toǵyz qylmystyq is qozǵalyp, tórt birdeı kompanııanyń basshysy isti boldy. Bul rette munaıgaz kompanııalarymen birlese jumys jasaýdyń mańyzy zor. Mysaly, prokýratýranyń bastamasymen qaldyqtardy basqarý salasynda qolǵa alynǵan «Tabıǵatty birge saqtaımyz!» jobasy júzege asyryla bastaǵannan beri birde-bir qylmystyq is tirkelgen joq. Joba iske qosylǵansha, toǵyz qylmystyq is qozǵalyp, qorshaǵan ortaǵa keltirilgen zalal mólsheri 1 mlrd. teńgeden assa, odan keıin ondaı zııan tirkele qoıǵan joq. Qaıta qaldyqtardy óńdeý, zalalsyzdandyrý 47,5 paıyzǵa artty.
BQO tabıǵat qorǵaý prokýrory Asylan Jańataýovtyń sózine qaraǵanda, úsh jylda, ıaǵnı 2014-2016 jyldary jalpy tekserý sany 2 esege kóbeıdi. Jer qoınaýyn paıdalanýshylardy tekserý 2,5 esege ulǵaıdy. Sonyń nátıjesinde ekologııalyq quqyqbuzýshylyq 2,5 esege artty.
Salalar boıynsha aıtqanda, qaldyqtardy ornalastyrý jáne zalalsyzdandyrý boıynsha quqyqbuzýshylyq 2, aýany lastaý 4, kólik quraldaryn paıdalaný kezinde shyǵaryndylardyń shamadan tys artýy 11 esege ósti. Tekserý kóbeıip, bıýdjetke túsetin aıyppul kólemi artqanymen, odan tabıǵatqa paıda kelip jatqan joq. Aıtalyq, zııandy zattardyń aýaǵa shyǵarylýy 35 paıyzǵa ósip otyr. Bul úshin zań aldynda ǵana emes, keler urpaq aldynda da jaýap berýge týra keledi.
Forýmda sondaı-aq Reseı Federatsııasynyń ekologııa, energetıka jáne turaqty damý boıynsha komıssııasynyń tóraǵasy Evgenıı Gosha, QR jobalyq menedjerler odaǵynyń prezıdenti Alekseı Tsehovoı, «Fın Bıznes Hab» halyqaralyq ınvestıtsııalyq kompanııasynyń dırektory Muhtar Mankeev jáne basqalar tabıǵat qorǵaý tóńireginde óz usynys-pikirlerin bildirdi.
