Batys Qazaqstanda Ekinshi dúnıejúzilik soǵys kezinen qalǵan snarıad tabyldy
ORAL. QazAqparat - Batys Qazaqstan oblysynda Ekinshi dúnıejúzilik soǵys kezinen qalǵan snarıad tabyldy, dep habarlaıdy QazAqparat tilshisi.
BQO polıtsııa departamenti baspasóz qyzmetinen túsken málimetke qaraǵanda, oqıǵa 24 mamyr kúni saǵat 16.30-da Bókeı ordasy aýdany ortalyǵy Saıqyn aýylynda boldy.
Aýyl shetinde jer qazyp jatqan turǵyn tattanyp ketken snarıad taýyp alǵan. Onyń uzyndyǵy 100 sm, dıametri 15 sm.
Snarıadty Oral qalasynan arnaıy barǵan saperlar zalalsyzdandyratyn bolady.
Ekinshi dúnıejúzilik soǵys kezinde Batys Qazaqstannyń Orda (qazirgi Bókeı ordasy), Jánibek aýdandary Stalıngrad maıdanyna tıip turǵandyqtan, soǵys jaǵdaıynda dep jarııalanyp, talaı ret bomba túsip, snarıad jarylǵan bolatyn.
Eske sala keteıik, budan buryn BQO-da avtokólik aýdarylyp, eki adam zardap shekkenin jazǵan bolatynbyz.
