Batys Qazaqstanda eki jeńil kólik soqtyǵysyp, júrgizýshi qaza tapty
ORAL. QazAqparat – Batys Qazaqstan oblysynda eki jeńil kólik túıisip, júrgizýshi qaza tapty, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa keshe tús mezgilinde Terekti aýdany ortalyǵy Fedorov aýyly mańynda oryn aldy.
«Folksvagen Passat» avtokóligi joldyń qarsy betine shyǵyp ketip, «Deý Espero» avtokóligimen betpe-bet soqtyǵysqan.
Sonyń saldarynan «Folksvagen Passat» avtokóliginiń júrgizýshisi oqıǵa ornynda qaza tapty. Ekinshi kóliktiń júrgizýshisi Terekti aýdandyq ortalyq aýrýhanasyna jetkizilgen.
Eki kólikte de jolaýshylar bolmaǵan.
Oblystyq densaýlyq saqtaý basqarmasynyń naqtylaýynsha, jaraqattar alǵan 1980 jylǵy er adam qazir aýrýhanada, jaǵdaıy turaqty.
