Batys Qazaqstanda eki turǵyn úı órtendi
ORAL. QazAqparat – Batys Qazaqstan oblysynda eki turǵyn úı órtendi, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, birinshi oqıǵa 20 naýryz kúni Terekti aýdany Barbastaý aýylynda boldy.
Saǵat 18.27-de B.Momyshuly kóshesi 2-mekenjaıynda turǵyn úıdiń janyp jatqany belgili boldy.
Aýmaǵy 90 sharshy metrdi qamtyǵan órt saǵat 20.14-te oqshaýlanyp, 21.21-de tolyqtaı sóndirildi.
Sondaı-aq búgin saǵat 10.24-te Oral qalasynda Q.Jumaǵalıev kóshesi 11-mekenjaıynda jeke úıdiń otqa oranǵany jóninde habar túsken.
Turǵyn úıdiń shatyry men tóbe jabyndary jandy. Aýmaǵy – 70 sharshy metr.
Oqıǵa ornynda jeke quramnan 17 adam 4 tehnıkamen jumys istedi.
«Tilsiz jaý» saǵat 11.27-de aýyzdyqtaldy.
Eki oqıǵadan da zardap shekkender joq.
BQO TJ departamenti órt qaýipsizdigi erejelerin qatań saqtaý kerektigin turǵyndar esine salady.
