Batys Qazaqstanda eki snarıad tabyldy
ORAL. QazAqparat – Batys Qazaqstan oblysynda eki snarıad tabyldy, dep habarlaıdy QazAqparat tilshisi.
BQO Polıtsııa departamentiniń baspasóz qyzmetinen túsken málimetke qaraǵanda, oqıǵa 26 qańtar kúni Qaztalov aýdany Qaraózen aýyldyq okrýginde oryn aldy.
«Qazaqııa» JShS qoryqshysynan Jas aýylynan úsh shaqyrym jerde «Saryshyǵanaq» qystaǵy mańynan áýe bombasyna uqsas snarıad taýyp alǵany jóninde habar túsken.
Snarıadtyń uzyndyǵy 150 sm, dıametri 40 sm.
Qaztalov aýdany polıtsııa bóliminiń qyzmetkerleri de atalǵan jarylǵysh zatty tekserý jáne aınalany qaraý barysynda dál osyndaı taǵy bir snarıad tapty. Uzyndyǵy men dıametri de birdeı.
Barlyq qaýipsizdik sharalary alyna otyryp, atalǵan aýmaq qorshaldy.
Snarıadtar arnaıy saperlar jáne mamandardyń kómegimen joıylatyn bolady.
