Batys Qazaqstanda eki aılyq sábı aýrýhanada kóz jumdy

ORAL. QazAqparat – Batys Qazaqstan oblysynda eki aılyq sábı aýrýhanada kóz jumdy, dep habarlaıdy QazAqparat tilshisi.

Oqıǵa Báıterek aýdany ortalyǵy Peremetnyı aýylynda boldy.

Aýdandyq ortalyq aýrýhananyń bas dárigeri Tımýr Musaǵalıevtiń aıtýynsha, eki aılyq qyz bala jedel járdemmen tańǵy saǵat 05.00-te jetkizilgen.

«Dárigerler sábıdi qarap, taldaýlar alyp, rentgenge túsirgen. Tıisti em-domdar, jansaqtaý sharalary jasalǵanymen, sábı saǵat 07.35-te kóz jumdy. Múrde sot-medıtsınalyq saraptamaǵa jiberildi. Sonyń qorytyndysy shyqpaı turyp, ólimniń neden bolǵanyn aıta almaımyz», dedi T.Musaǵalıev.

BQO polıtsııa departamentiniń baspasóz qyzmeti oqıǵany rastap, adam óliminiń derek retinde tirkelgenin jetkizdi.

«Saraptama taǵaıyndaldy. Sonyń qorytyndysy boıynsha zańdy sheshim qabyldanady», dep habarlady vedomstvodan.