Batys Qazaqstanda eki avtokólik túıisip, tórt adam zardap shekti
ORAL. QazAqparat – Batys Qazaqstan oblysynda eki avtokólik túıisip, tórt adam zardap shekti, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkendeı, oqıǵa 28 mamyr kúni túste Oral-Atyraý kúrejoly boıynda Aqjaıyq aýdany aýmaǵynda boldy.
Aqsýat aýyly tusynda «Shevrolet Krýz» jáne «Nıssan» avtokólikteri soqtyǵysty. Sonyń saldarynan «Nıssan» avtokóliginiń 43 jastaǵy júrgizýshisi men jolaýshysy synyq jaraqattaryn alǵan.
Oqıǵa ornynda polıtsııa qyzmetkerleri jumys jasap, mán-jaıdy anyqtaý ústinde.
Oblystyq densaýlyq saqtaý basqarmasynyń naqtylaýynsha, saǵat 12.43-te jedel járdem shaqyrylyp, brıgada 13.00-de jetti.
Jol-kólik oqıǵasynan tórt adam zardap shekti.
Jambasy men jilinshigi synǵan Atyraý oblysynda turatyn 43 jastaǵy er adam Aqjaıyq aýdandyq ortalyq aýrýhanasynyń hırýrgııalyq bólimshesine jatqyzyldy.
Keýde tusy kógergen 19 jastaǵy qyz ben tizesi kógergen 41 jastaǵy er adam (ekeýi de Aqtaý qalasynan) ambýlatorlyq em alýǵa jiberildi.
Reseıdiń Máskeý oblysynda turatyn 1956 jylǵy áıeldiń buǵanasy synǵan. Ol da ambýlatorlyq em alatyn bolady.
Eske sala keteıik, budan buryn Oralda avtokólik qaǵyp ketken er adamnyń aýrýhanada kóz jumǵanyn jazǵan bolatynbyz.
