Batys Qazaqstanda eki avtokólik soqtyǵysyp, bir adam mert boldy
ORAL. QazAqparat - Batys Qazaqstan oblysynda eki avtokólik soqtyǵysyp, bir adam mert boldy, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz qyzmeti málim etkenindeı, oqıǵa búgin Oral-Atyraý jolynda Aqjaıyq aýdany Aqbulaq jáne Aqsýat aýyldarynyń orta tusynda boldy.
Oqıǵa ornyna trassalyq-medıtsınalyq qutqarý beketi jáne Іlbishin dárigerlik ambýlatorııasynyń brıgadasy bardy.
Aldyn ala málimetke qaraǵanda, bes adam zardap shekti. Bir adam kóz jumsa, ekinshisiniń jaǵdaıy aýyr.
BQO polıtsııa departamentiniń baspasóz qyzmeti oqıǵany rastap, aqparattyń keıin beriletinin jetkizdi.
Belgili bolǵany, kólikterdiń biri «DAF» markili júk kóligi bolsa, ekinshisi «Toıota Alfard».
Eske sala keteıik, budan buryn Batys Qazaqstanda jol apatynan alty adamnyń qaza tapqanyn, jeńil jáne júk kóliginiń túıisýi saldarynan júrgizýshiniń aýrýhanaǵa túskenin, sondaı-aq boranǵa baılanysty respýblıkalyq joldyń jabylǵanyn jazǵan bolatynbyz.
