Batys Qazaqstanda eki avtokólik soqtyǵysyp, 9 adam aýrýhanaǵa jetkizildi
ORAL. QazAqparat – Batys Qazaqstan oblysynda eki avtokólik soqtyǵysyp, 9 adam aýrýhanaǵa jetkizildi, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa 1 aqpan kúni shamamen saǵat 13.00-de Oral-Atyraý joly boıynda boldy.
«Lada Largýs» pen «Datsun» avtokólikteri túıisti.
Polıtsııa qyzmetkerleri oqıǵa ornyna baryp, anyqtaǵanyndaı, «Lada Largýs» avtokóligi qolaısyz aýa raıyna baılanysty joldyń qarsy betine shyǵyp ketken. Sodan «Datsun» avtokóligimen túıisken.
Aqjaıyq aýdandyq ortalyq aýrýhanasynyń dırektory Almas Júnisbekovtiń naqtylaýynsha, aýdan ortalyǵy Chapaevtan 30 shaqyrym jerde, Samal aýyly tusynda bolǵan jol apatyna saǵat 13.05-te jedel járdem shaqyryldy.
Avtokólikterde barlyǵy 11 adam bolǵan. Ekeýi dárigerge qaralýdan bas tartty.
«Qalǵan 9-y túrli jaraqattarmen aýdandyq aýrýhanaǵa jetkizildi. Olardyń ishinde 1 jasqa tolmaǵan bala bar. Onyń jaǵdaıy ortasha, bir qalypty, bas mıy jeńil túrde shaıqalǵan. Úsh adam jambas, san súıekteri synyǵymen túsken. Bárine alǵashqy medıtsınalyq kómek kórsetildi. Oblystyq sanavıatsııamen travmatolog shaqyrtyldy», dedi A.Júnisbekov.
Eske sala keteıik, budan buryn Oralda avtokólik qaqqan 70 jastaǵy zeınetkerdiń aýrýhanaǵa túskenin jazǵan bolatynbyz.
