Batys Qazaqstanda eki avtokólik soqtyǵysyp, 4 adam jaraqat aldy
ORAL. QazAqparat – Batys Qazaqstan oblysynda eki avtokólik soqtyǵysyp, tórt adam jaraqat aldy, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 5 sáýir kúni saǵat 19.24-te Aqjaıyq aýdany Tinálıev aýyly mańynda boldy.
Atyraý-Oral jolynyń 195-shaqyrymynda «Folksvagen Polo» men «Toıota Kamrı» avtokólikteri túıisti.
Sonyń saldarynan 5 adam zardap shekti, barlyǵynyń da jaǵdaıy ortasha dárejede.
Trassalyq-medıtsınalyq qutqarý beketiniń qyzmetkerleri olarǵa alǵashqy kómek kórsetip, Aqjaıyq aýdandyq ortalyq aýrýhanasyna jetkizdi.
BQO densaýlyq saqtaý basqarmasy baspasóz qyzmetiniń naqtylaýynsha, oqıǵa saldarynan tórt adam jaraqat aldy. 48 jastaǵy er adamnyń mıy shaıqalyp, basy men tizesi kógergen. 37 jastaǵy er adam ashyq bas-mı jaraqatyn alǵan, mańdaı súıegi synǵan. Ekeýi de aýrýhanaǵa jatqyzyldy. Keýde tusynan jaraqat alǵan 40 jastaǵy áıel men mańdaı tusy, basynyń jumsaq tinderi kógergen 31 jastaǵy er adam ambýlatorlyq em alýǵa jiberildi.
Qazirgi kezde oqıǵanyń mán-jaıy anyqtalý ústinde.
Sonymen qatar 6 sáýir kúni saǵat 03.11-de Aqjaıyq aýdany Qamystykól aýyly tusynda eki avtokóliktiń synyp qalǵany jóninde habar túsken. Oqıǵa ornynan qutqarýshylardyń kúshimen 10 adam Qamystykólge jetkizildi, olardyń ekeýi – bala.
