Batys Qazaqstanda eki adam sýǵa batyp ketti
ORAL. QazAqparat - Batys Qazaqstan oblysynda eki adam sýǵa batyp ketti, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, birinshi oqıǵa 17 mamyr kúni keshkisin Tasqala aýdany Tasqala aýylynda boldy.
Saǵat 19.40-ta 1973 jylǵy er adam mas kúıinde balyq aýlaý kezinde Derkól ózenine batyp ketken.
Marqumnyń denesi TJ departamenti kúshimen (2 qyzmetker, 1 tehnıka) saǵat 21.56-da sýdan shyǵaryldy.
Sondaı-aq taǵy bir osyndaı oqıǵa Oral qalasynda boldy.
Saǵat 21.17-de qalalyq mádenıet jáne demalys saıabaǵy aýmaǵynda Shaǵan ózeninde katamaranmen júzip júrgen demalýshydan jaǵajaıda óli adamnyń denesi kóringeni jóninde habar túsken.
Jedel qutqarý jasaǵynyń súńgýirleri atalǵan jerden 50 jas shamasyndaǵy mas kúıindegi er adamnyń denesin alyp shyqty. Bul jumys 21.30-da aıaqtaldy.
Sońǵy kúnderi óńirde kún qatty ysyp ketti. Osyǵan oraı TJ departamenti turǵyndardan sýǵa túsý erejelerin qatań saqtaý kerektigin eskertedi.
Eske sala keteıik, budan buryn Oralda iri qoımada órt shyqqanyn jazǵan bolatynbyz.
