Batys Qazaqstanda eki adam sýǵa batyp ketti
ORAL. QazAqparat - Batys Qazaqstan oblysynda sýǵa batyp ketken eki turǵynnyń múrdesi tabyldy, dep habarlaıdy QazAqparat tilshisi.
Qaztalov aýdandyq TJ bóliminiń basshysy Abaı Násipovtiń aıtýynsha, Aqpáter aýylynyń 1983 jylǵy turǵyny Damır Satybaldıev 18 sáýir kúni joǵalyp ketken bolatyn. Marqumnyń denesi 6 mamyr kúni Aqpáter mańyndaǵy Qaraózennen tabyldy.
Sol 6 mamyr kúni taǵy bir qaıǵyly oqıǵa tirkeldi. Aqpáter aýylynyń 1953 jylǵy turǵyny Jumaǵalı Toqbaev Qaraózenge balyq aýlaýǵa baryp, belgisiz sebeptermen batyp ketken. Denesi sol kúni tabylǵan.
Eske sala keteıik, Qaztalov aýdanynda joǵalyp ketken D.Satybaldıevtiń izdestirilip jatqanyn buǵan deıin jazǵan bolatynbyz. Odan buryn osy aýdanda ótken jyly qarashada joǵalǵan turǵynnyń denesi de bıyl kóktemde sýdan shyqqan edi.
