Batys Qazaqstanda Dına Nurpeıisova atyndaǵy kúı baıqaýynyń jeńimpazdary anyqtaldy

ORAL. QazAqparat – Batys Qazaqstan oblysynda Qazaqstannyń halyq ártisi, kúı anasy Dına Nurpeıisovanyń 160 jyldyǵyna arnalǵan «Ásemqońyr» respýblıkalyq dombyrashylar baıqaýy márege jetti, dep habarlaıdy QazAqparat tilshisi.

Dınanyń týǵan jeri – Jańaqala aýdany Qyzyloba aýyldyq mádenıet úıinde ótken kúı saıysyna Nur-Sultan, Almaty qalalary men Atyraý, Mańǵystaý, Qyzylorda, Batys Qazaqstan oblystarynan úmitkerler qatysyp, baq synady.

Eki kúnge sozylǵan saıysqa belgili kúıshi-ustaz, professor Aıtjan Toqtaǵan bastaǵan óner maıtalmandary qazylyq etti.

Baıqaý qorytyndysynda atyraýlyq Aqbóken Temir bas júldeni jeńip aldy.

Batysqazaqstandyq Jasulan Zeınedınov birinshi, almatylyq Móldir Qoıysova men taǵy bir BQO ókili Raýshan Shaqanaeva ekinshi orynǵa kóterildi.

Elordalyq Nargıza Qasymova, almatylyq Baıan Qyrǵyzbaı, qyzylordalyq Botagóz Jaqsylyq úshinshi júldeni bólisti.

Elordalyqtar Nurbolat Tapalov, Meıram Aıtmaǵanbetov jáne almatylyq Baıan Tileýbergen dıplomant atandy.

Atalmysh baıqaý aldaǵy ýaqytta bes jyl saıyn uıymdastyrylyp turmaqshy.

Eske sala keteıik, budan buryn BQO-da Dına Nurpeıisovanyń 160 jyldyǵyna oraı respýblıkalyq dombyrashylar baıqaýy ótetinin jazǵan bolatynbyz.