Batys Qazaqstanda dene shynyqtyrý-saýyqtyrý kesheni ashyldy
ORAL. QazAqparat – Bókeı ordasy aýdany ortalyǵy Saıqyn aýylynda dene shynyqtyrý-saýyqtyrý kesheni paıdalanýǵa berildi, dep habarlaıdy QazAqparat tilshisi.
Zamanaýı ǵımarattyń ashylý rásimine qatysqan oblys ákimi Ǵalı Esqalıev jańa keshende jastar men eresekterdiń sportpen belsendi aınalysyp, densaýlyqtaryn shyńdaýǵa múmkindik mol ekendigin jetkizdi.
«Ultjandy urpaqty tárbıeleýde sporttyń mańyzy erekshe. Keńes dáýirinde osyndaı shalǵaı aýyldarǵa asa nazar aýdarylmaǵany belgili. Elimiz táýelsizdik alǵannan bergi kezeńde aýdanǵa tabıǵı gaz qubyry tartyldy. Elbasynyń tapsyrmasyna sáıkes oblys ortalyǵymen jalǵastyratyn qatqyl tabandy jol salynýda. Óńirde Qarashyǵanaqty ıgerip jatqan «Qarashyǵanaq Petrolıým Opereıtıng b.v.» kompanııasynyń qarjysyna áleýmettik nysandar boı kóterýde. Sonyń biri – osy dene shynyqtyrý-saýyqtyrý kesheni», dedi óńir basshysy.
Aýqymdy aýmaqty alyp jatqan ǵımarattyń quny – 428,531 mln teńge.
Rásim barysynda qurylysqa tapsyrys berýshi «QPO b.v.» kompanııasy men jaýapty merdiger «Naýryz» JShS atyna alǵys aıtyldy.
160 adamǵa arnalǵan keshenge kelýshiler kúres, boks, basketbol, voleıbol, ústel tennısi jáne basqa sport túrlerimen shuǵyldana alady.
Eske sala keteıik, budan buryn Batys Qazaqstan oblysynda úzdik sportshylar men bapkerler marapattalǵanyn jazǵan bolatynbyz.
