Batys Qazaqstanda dárigerlerdiń qurmetine monýment ornatyldy
ORAL. QazAqparat - Oralda Batys Qazaqstan oblystyq klınıkalyq aýrýhanasynyń 150 jyldyǵy atalyp ótildi, dep habarlaıdy «QazAqparat» tilshisi.
Mereıtoıǵa oraı oblystyq qazaq drama teatrynda uıymdastyrylǵan saltanatty sharada aýrýhana ujymyn oblys ákiminiń birinshi orynbasary Arman Óteǵulov quttyqtap, aq jeleńdi jandardyń kún saıynǵy bilikti de qajyrly eńbegine rızashylyǵyn bildirdi.
Onyń atap ótkenindeı, Elbasy tapsyrmasyna sáıkes densaýlyq salasyna memleket tarapynan udaıy kóńil bólinip, qoldaý kórsetilýde. Bıyl óńirde 19 densaýlyq saqtaý nysanyna kúrdeli jóndeý josparlanyp, oǵan 856 mln teńge qarastyrylǵan. Onymen qosa memlekettik-jekemenshik áriptestik salasynda úsh joba júzege asyrylýda. Óńirdegi densaýlyq saqtaý mekemeleri arasynda oblystyq aýrýhananyń orny erekshe. Budan 150 jyl buryn alty tósektik ambýlatorııadan bastalǵan mekeme qazirgi tańda konsýltatıvti emhanaǵa qosa, 440 kereýetke eseptelgen, 26 baǵyt boıynsha qyzmet kórsetetin, osy zamanǵy medıtsınalyq qural-jabdyqpen jasaqtalǵan 17 mamandandyrylǵan bólimshesi bar iri emdeý ornyna aınaldy.
Saltanatty shara barysynda hırýrg Erbol Eseev pen endokrınolog Dınara Májıtovaǵa oblys ákiminiń alǵyshattary tabys etildi. Bir top qyzmetkerge basqa da marapattar berildi.
Oblystyq aýrýhana dırektory Erlan Toqsanovtyń sózine qaraǵanda, kúni búgin mekemede 833 maman eńbek etse, sonyń 123-i - dáriger, 377-si - orta býyn medıtsına qyzmetkerleri. Táýlik boıy jumys jasaıtyn statsıonarda jyl saıyn 17 myńnan astam adam em alady. Sondaı-aq kúndizgi statsıonarda 5 myńnan astam naýqas emdeledi. Joǵary tehnologııalyq medıtsınalyq qyzmet 510-nan astam adamǵa kórsetilgen. Sanıtarlyq áýejaı arqyly 200-den astam adamǵa shuǵyl járdem berildi.
Merekelik shara barysynda oblystyq aýrýhana aýlasynda barlyq aq jeleńdi jandardyń qurmetine monýment (avtory Erǵalı Bekeshev) ornatyldy. Onda aınalasyna shýaq shashqan maıshamdy ustap turǵan qoldar beınelengen.
