Batys Qazaqstanda dári-dármek satýda zań talaptaryn buzǵandarǵa aıyppul salyndy
ORAL. QazAqparat – Batys Qazaqstan oblysynda dári-dármek satýda zań talaptaryn buzǵandarǵa aıyppul salyndy, dep habarlaıdy QazAqparat tilshisi.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkendeı, 5-22 shilde aralyǵynda QR Sybaılas jemqorlyqqa qarsy is-qımyl agenttigi BQO boıynsha departamenti men ekonomıkalyq tergeý departamentinen 42 materıal túsken.
Sonyń ishinde QR Ákimshilik quqyq buzý kodeksi 424-baby 1-bóligine sáıkes lıtsenzııasyz qyzmeti úshin 5 jeke tulǵaǵa 34 725 teńge aıyppul salyndy. Bir materıal qaralý ústinde.
Sonymen qatar QR Ákimshilik quqyq buzý kodeksi 426-baby 1-bóligine sáıkes, dári-dármekti shekti baǵadan asyryp satqany úshin «Mendybaeva J.G.» JK men «Adema-Farm» JShS-ǵa 361 140 teńge aıyppul salyndy.
Oǵan qosa, QR Ákimshilik quqyq buzý kodeksi 426-baby 3-bóligine sáıkes, Qazaqstanda qoldanýǵa ruqsat berilmegen dárilik zattardy satý boıynsha 20 materıal ákimshilik sotyna jiberildi. Sonyń ishinde «Botova I.P.» JK, «Kalýgına V.M.» JK, «MedMarket-Ekspert» JShS jáne eki jeke tulǵaǵa 100-den 300-ge deıingi AEK kóleminde aıyppul salyndy.
QR Ákimshilik quqyq buzý kodeksi 463-baby 1-bóligine sáıkes, tıisti tirkeýsiz, ruqsatsyz nemese habarlama jibermeı kásipkerlik nemese ózge de qyzmetpen aınalysý, sondaı-aq is-áreketterdi júzege asyrý boıynsha úsh materıal sotqa joldandy. Bir is boıynsha «Nobel AFF» AQ-ǵa 150 AEK kóleminde aıyppul salyndy.
Qalǵan materıaldar qaralý ústinde.
«Eger dárilik preparattardy joǵary baǵamen satyp jatqan farmatsevtıkalyq qyzmet sýbektileriniń (dárihanalardyń) quqyqqa qaıshy is-áreketteri týraly belgili bolsa, turǵyndar 8 (7112) 51-27-66 telefony arqyly habarlasa alady. Dári-dármektiń shekti baǵasyn DARI.KZ saıtynan bilýge bolady», deıdi departament mamandary.
Eske sala keteıik, budan buryn Oralda eriktilerdiń 40 myń maskany tegin taratqanyn, Batys Qazaqstanda toı ótkizgen toǵyz turǵynǵa aıyppul salynǵanyn jazǵan bolatynbyz.
