Batys Qazaqstanda brakonerler «Ohotzooprom» ınspektorlaryna oq atty
ORAL. QazAqparat – Batys Qazaqstan oblysynda «Ohotzooprom» ınspektorlaryna oq atty, dep habarlaıdy QazAqparat tilshisi.
QR Ekologııa, geologııa jáne tabıǵı resýrstar mınıstrliginiń Instagramdaǵy paraqshasynda málim etilgenindeı, oqıǵa 16 aqpan kúni Kaztalov aýdany aýmaǵynda boldy.
«Ohotzooprom» ÓB» RMQK Batys Qazaqstan óńirlik fılıalynyń ınspektorlaryna eki brakoner qarsylyq kórsetip, oq atqan. Abyroı bolǵanda, adam shyǵyny men jaraqat alǵandar joq.
Inspektorlar reıdtik is-sharalar kezinde Juldyz aýyly mańynda «Boran» markaly qarda júretin kóliktiń izine túsken. Jedel qýyp jetken qoryqshylardyń pármenine qulaq aspaǵan qaskóıler «Toıota» qyzmettik kóligine anyqtalmaǵan myltyqtan shamamen 10 ret oq atqan. Avtomobıldiń aldyńǵy dóńgelekteri jarylyp, bamperi zaqymdalǵan.
Inspektorlardyń tabeldik qarýdan eskertý oq atqandaryna qaramastan, brakonerler kórshiles Jańaqala aýdany Jańaqazan aýylyna qaraı izderin sýytqan.
Oqıǵa ornyna Kaztalov aýdany polıtsııa bóliminiń qyzmetkerleri shaqyrylyp, osy derek boıynsha qylmystyq is qozǵaldy.
BQO polıtsııa departamentiniń resmı ókili Bolatbek Nurǵojın oqıǵanyń 16 aqpan kúni shamamen saǵat 17.40-ta oryn alǵandyǵyn jetkizdi.
«Qazirgi kezde QR QK 380-2-babyna (quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq) sáıkes sotqa deıingi tergeý amaldary júrgizilýde. Kaztalov aýdany polıtsııa bóliminiń qyzmetkerleri osy qylmysty ashýǵa baǵyttalǵan is-sharalardy atqarýda», dedi QazAqparat tilshisine B.Nurǵojın.
Eske sala keteıik, budan buryn Oralda belgisiz bireýdiń turǵyndy tonap, avtokóligin alyp ketkenin jazǵan bolatynbyz.
