Batys Qazaqstanda boranǵa baılanysty júk kólikteri jolda qaldy
ORAL. QazAqparat – Batys Qazaqstan oblysynda boranǵa baılanysty júk kólikteri jolda qaldy, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkendeı, oqıǵa 8 naýryz kúni oblys joldarynda boldy.
Saǵat 17.30-da Syrym aýdany aýmaǵynda Samara-Shymkent jolynda Aqtóbe baǵytynda ketip bara jatqan júk kóliginiń synyp qalǵany jóninde habar tústi. Oqıǵa ornyna №14 órt sóndirý beketiniń qyzmetkerleri jedel jetti.
Keıin anyqtalǵanyndaı, Samara-Shymkent jolynyń 490-shaqyrymynda 3 júk kóligi jol jıegine túsip ketken. Júrgizýshiler evakýatsııalaýdan bas tartty.
Búgin saǵat 11.15-tegi málimet boıynsha Samara-Shymkent jolynyń 490-522 shaqyrymy aralyǵynda jol jıegine túsip ketken 5 júk kóligi qalyp otyr.
Onyń bireýi tehnıkalyq aqaýyna baılanysty tur. Qazirgi ýaqytta júrgizýshilerge kómek kórsetilýde.
Keshe saǵat 22.00-de boranǵa baılanysty jabylǵan Oral-Tasqala-RF shekarasy jolynyń 80-shaqyrymynda Tasqala aýdany Birlik aýyly tusynda 12 júk kóligi jáne júk tıegen 3 «GAZel» kóliginiń turyp qalǵany belgili boldy. Qutqarýshylardyń baqylaýymen kólikter jolǵa shyqty.
Saǵat 23.49-da Oral qalasy aýmaǵynda Derkól-Beles aýyldyq jolynda Kardon eldi mekeni tusynda qutqarýshylardyń kúshimen (2 adam, 1 tehnıka) 3 jeńil kólik tazartylǵan jerge shyǵaryldy. 13 adam qutqaryldy, sonyń úsheýi – balalar.
BQO TJ departamenti qysqy kezeńde jolda qaýipsizdik talaptaryn qatań saqtaý kerektigin eske salady.
Joldyń jaǵdaıyn «Dármen» mobıldi qosymshasy arqyly bilýge bolady. Qutqarýshylar kómegi qajet bolǵan jaǵdaıda 112 telefonyna habarlasý kerek.
Eske sala keteıik, budan buryn Batys Qazaqstanda boranǵa baılanysty respýblıkalyq jol jabylǵanyn jazǵan bolatynbyz.
