Batys Qazaqstanda boranǵa baılanysty joldarda qozǵalys shekteldi
«QazAvtoJol» JShS BQO fılıalynyń málimeti boıynsha 6 naýryz kúni saǵat 20.30-dan bastap kórshiles Aqtóbe oblysynda aýa raıynyń nasharlaýyna baılanysty (kúshti jel, boran, joldyń kórinýi qıyndaýy) respýblıkalyq mańyzy bar Samara-Shymkent (392-526 km, Jympıty aýylynan Aqtóbe oblysyna deıin) joly barlyq kólik túrleri úshin jabyldy.
Sondaı-aq BQO jolaýshylar kóligi jáne avtomobıl joldary basqarmasy málim etkenindeı, oblystyq mańyzy bar Tasqala-Aqqýraı-Bolashaq-RF shekarasy (0-157 km, Tasqala aýylynan RF shekarasyna deıin) jolynda barlyq kólik túrleriniń qozǵalysyna shekteý qoıyldy.
Bul mańda da qatty borannyń saldarynan joldyń kórinýi nasharlaǵan.
BQO TJ departamenti eskertý jarııalap, atalǵan baǵyttarda turǵyndarǵa jolǵa shyqpaý kerektigin jetkizdi.
Eske sala keteıik, budan buryn Batys Qazaqstanda kóktaıǵaqqa baılanysty joldar jabylǵanyn, qar qursaýynda qalǵan jolaýshylardyń qutqarylǵanyn jazǵan bolatynbyz.