Batys Qazaqstanda boranǵa baılanysty joldar jabyldy
ORAL. QazAqparat - Batys Qazaqstan oblysynda boranǵa baılanysty joldar jabyldy, dep habarlaıdy QazAqparat tilshisi.
BQO TJ departamentinen alynǵan málimetke qaraǵanda, 29 qańtar kúni kúshti boran men jeldiń jyldamdyǵy sekýndyna 20 metrge jetýine baılanysty aldymen respýblıkalyq mańyzy bar Podstepnyı-Fedorov-RF shekarasy jolynyń Fedorov-RF shekarasy bóligi (37-144 km) saǵat 18.00-den bastap jabyldy.
Sodan keıin Samara-Shymkent jolynyń Jympıty-Aqtóbe oblysy shekarasy (394-526 km) bóliginde barlyq kólik túrleri úshin saǵat 21.40-tan bastap qozǵalysqa shekteý qoıyldy.
«Sondaı-aq 27 qańtardan bastap jabylǵan oblystyq mańyzy bar Shyńǵyrlaý-Lýben-Segizsaı jáne Tasqala-Aqqýraı-Bolashaq joldary áli ashylǵan joq», dep habarlady BQO TJ departamentinen.
Aıta keteıik, 29 qańtar kúni shamamen saǵat 11.40-ta Samara-Shymkent jolynyń 344-shaqyrymynda Syrym aýdany aýmaǵynda jeti birdeı júk kóligi túıisti.
BQO polıtsııa departamentiniń baspasóz qyzmetinen túsken málimet boıynsha oqıǵa aldyńǵy kóliktiń kilt toqtaýynan oryn alǵan. Zardap shekkender joq. Degenmen júk kólikteriniń soqtyǵysýy saldarynan keptelis boldy.
Óńirde budan buryn da joldar jabylǵan bolatyn.
